VOV4.Jarai-Mơguah lơ 12/8, ƀơi plơi prong Nha Trang, tơring čar Khánh Hòa, Anom mơnuih tơpuôl Gong phun jua pơhiăp Việt Nam ngă hrom anom bruă Pơtui jua pơhiăp dŏ ƀơi kual Tong krah-Dap Kơdư, Gong phun jua pơhiăp Việt Nam pơphun pơplông pơrơguăt drơi jăn hăng adoh suang thun 2022. Tal pơplông adoh suang pơrơguăt drơi jăn anai pơphun amăng dua hrơi lơ 12 hăng lơ 13/8.
Yă Vi Thanh Huyền, Kơ-iăng Khua anom mơnuih tơpuôl Gong phun jua pơhiăp Việt Nam hăng ƀing ding kơna Khul pơphun pơplông nao ƀơk pŏ bơnga, hlă kơ hơdor pioh kơ djop grup nao pơplông
Anai lĕ bruă mă gru grua pơrơguăt drơi jăn thun 2022 yua anom bruă mơnuih tơpuôl Gong phun jua pơhiăp Việt Nam pơphun, kiăng hok mơak čơkă hơdôm hrơi jơnum prong, ngă lơphet kơ dêh čar, pơplông kiăng tŭ mă apah bơni hơdor glăi tal 77 thun akŏ pơdong anom bruă Gong phun jua pơhiăp Việt Nam lơ 7/9/1945-lơ 7/9/2022. Nao pơplông hrom hơmâo giăm 100 čô mơnuih mă bruă, ƀing čih tơlơi pơhing, pô gư̆ măi jua pơhiăp, ƀing čih dăp jơlan hơdră pơtui jua pơhiăp mơ̆ng 8 boh sang bruă gah Gong phun jua pơhiăp Việt Nam amăng kual Tong krah hăng kual Dap Kơdư.
Djop grup nao pơplông hlăk pơplông hơdui hrĕ
Amăng dua hrơi pơplông, ƀing nao pơplông rơjang drơi jăn pah blâo mơnŭ, pah peng pong, kơplong kơdăt hrôm tơkai amăng kơsăk, hơdui hrĕ…. Rơngiao kơ anun, pơplông adoh suang hăng lu hơdră tơlơi adoh suang hiam mơak, pơhưč mơnuih ĕp lăng hok mơak hrom.
Nay
Jek: Pơblang
Viết bình luận