VOV4.Jarai - Ƀrô hrơi yua kơ mơnuih djơ̆ jrao hret Việt Nam (10/8) ƀơi tơring čar Kon Tum hơmâo pơdă prưng “Jrao hret - Tơlơi thâo pap hăng Tơlơi gal” yua Khul mơnuih djơ̆ jrao hret dioxin Việt Nam, Binh chủng hoá học hăng Jơnum min mơnuih ƀon sang tơring čar Kon Tum ngă hrŏm ăt ngă pơhưč lu mơnuih nao lăng mơn. mrô jŭ yap mơng Sang djă pioh Hră pơ-ar tơring čar Kon Tum brơi ƀuh, amăng 20 hrơi rơgao, hơmâo laih rơbêh 1.000 wơ̆t čô tuai nao lăng rup “Jrao hret - Tơlơi thâo pap hăng Tơlơi gal”.

Amăng mrô tuai nao lăng hơmâo lu tuai mơng dêh čar tač rơngiao hăng ƀing djơ̆ jrao hret dioxin yua tơhan Mi hrai trun kual Dơnung amăng rơnuk blah sua lŏn ia Việt Nam mơng thun 1961 truh thun 1971. Ăt pok bah amăng čơkă tuai nao lăng truh abih lơ 25/8, pơdă prưng “Jrao hret - Tơlơi thâo pap hăng Tơlơi gal” pơƀuh giăm 400 pok rup, hră pơ-ar, gơnam tam. Mơng bruă pơdă prưng anai, mơnuih ƀon sang hăng ƀing tuai thâo hluh rơđah hloh kơ tơlơi ngă sat răm mơng jrao hret dioxin hăng anih hơdip wơ̆t hăng tơlơi suaih pral ană mơnuih ta.

Siu H’Mai: Pơblang