Dong amăng hơdôm hrơi ngui amăng rơwang hrơi tơjuh gru grua-tuai čuă ngui tơring čar Kon Tum tal 5 thun 2024, tal hơdor glăi 56 thun hrơi tuh rơyuh pran jua, djai pơsăn drơi mơng ling tơhan ƀơi kơčong čư̆ mrô 995-Chư Tan Kra (26/3), Jơnum min mơnuih ƀôn sang tơring glông Sa Thầy hơmâo gum hrŏm hăng gơnong bruă gru grua, bơrơguăt drơi jăn hăng tuai čuă ngui tơring čar Kon Tum pơphun tal pơplông por yu pok prong “Hyu čuă lăng kual čư̆ siăng kriang pơtâo-Sa Thầy thun 2024”.

Tal pơplông pơphun amăng 3 hrơi, mơng mơguah lơ 22/3 truh abih lơ 24/3, hăng rơbêh 120 čô mơnuih nao pơplông, amăng anun hơmâo 45 čô mơnuih mơng tač rơngiao glăk mut hrŏm pơtop hrăm hăng juăt nao jơnum pơƀut na nao ƀơi hơdôm grup por yu amăng dêh čar. Mơng hơdôm tơlơi ngui anai, khul pơphun čang rơmang tŏ tui hăng pơđĭ kyar tơlơi ngui por yu amăng ƀon lan; pơlir hăng hơdôm tơlơi ngui hŭi rơhyưt, gru grua…jai hrơi jing anih čuă ngui pơhưč lu mơnuih.