Pơphun mơng lơ 26/12/2022 hăng sui truh kơ Tết Prang 2023, Rơwang hrơi tơjuh bôh thâo đưm – Čuă ngui Măng Đen thun 2022 dưi hmâo Jơnum min mơnuih ƀôn sang tơring glông Kon Plông, tơring čar Kontum pơphun ƀơi Kual tuai čuă ngui dlai tlô Măng Đen hmâo ngă pơhư̆č lu tuai nao găn rơgao lăng bôh thâo đưm Dăp Kơdư. Adơi Lương Phạm Việt Anh, tuai mơng tơring čar Daknông, brơi thâo, nao pơ̆ Măng Đen, Việt Anh hmâo pel ĕp laih hơdôm grŭp adôh suang djuai ania Hơdang atông čing hơgor – suang, pĕ gông atông brô̆ djuai ania hăng ñu ƀuh tơlơi kiăng khăp biă hăng mơnuih ƀôn sang ƀơi anai:

 “Tơlơi mưn ƀuh mơng kâo hling hlang hmâo mơn, lăng ñu juăt hăng pô mơn, yua kơ sang kâo nao dô̆ ƀơi kual Dăp Kơdư kâo jing laih sa čô mơnuih mơng kual Dăp Kơdư. Kâo ƀuh ol kơdol pran jua biă lĕ khăp kơ ană mơnuih ƀơi anai. Djop mơnuih ƀơi anai mơ-ak biă, hur har pran jua”.

Amăng lu bruă mă dưi pơphun ƀơi Kual tuai čuă lăng dlai tlô Măng Đen tal pơdơi lơphet thun phrâo 2023, ngă pơhư̆č tuai čuă ngui hloh lĕ bôh thâo “Anih mơ-ak hloh Dăp Kơdư”. Ƀơi anai gah yŭ kơ kyâu hngô, hmâo 5 bôh sang rông đưm mơng djuai ania Hơdang djuai Mơ Nâm hăng Ka Dong dưi hơkrŭ pơdŏng glăi. Hrom hăng anun hơdôm rơtuh mơta gơnam nao hrom hăng tơlơi hơdip mơda rim hrơi mơng mơnuih ƀôn sang dưi pơdă lăng klă biă. Adơi Nguyễn Ngọc Thủy Trang, čơđai gưl dlông thun hrăm tal 2 Đại học FPT ƀơi ƀôn prong Hồ Chí Minh, brơi thâo:

 “Anai lĕ tal blung a kâo rai pơ̆ Măng Đen, kâo ƀuh tơlơi hơdip mơda mơnuih ƀôn sang ƀơi anai mơ-ak biă. Khă arăng kơƀah tơnap hai samơ̆ pran jua gơñu ƀu kơƀah ôh. Mơnuih ƀôn sang lĕ arăng hmâo sa mông ƀong huă pơđao pran jua tơdruă biă. Kâo nao pơ̆ Đà Lạt laih hăng kâo ƀuh Măng Đen ƀu hrup hăng Đà Lạt ôh, ñu hmâo hơdôm anih čuă ngui pha ra hăng Đà Lạt biă. Pơgi kơdih anai sit ñu kâo amra pơwot glăi Măng Đen hăng sa čô mơnuih hơpă thơ hiưm ñu”.

Ơi Đặng Đình Toán, Khua Anom bruă bôh thâo hăng tơlơi pơhing tơring glông Kon Plông brơi thâo, kiăng ngă pơhư̆č mơnuih ƀôn sang ăt kah hăng tuai čuă ngui nao găn rơgao lăng bôh thâo đưm Dăp Kơdư ƀơi Kual čuă lăng dlai tlô Măng Đen pơdơi lơphet thun phrâo 2023, tơring glông Kon Plông hmâo laih tơlơi tuh pơplai akô̆ tlôn. Hrom hăng anun, gum hrom hăng pô dăp kơdră Minh Hạnh hăng mơnuih djă pioh gơnam đưm Dăp Kơdư, Đặng Minh Tâm dăp hơdră, pơdă prưng sa bôh thâo Dăp Kơdư pơƀut anet ƀơi Măng Đen:

 “Hluai tui bôh thâo đưm mơng ƀing gơmơi anai, sa tơlơi pơhing kiăng mơ-ĭt kơ abih bang tuai rơngiao anun lĕ bruă pơgang, ngă tui hơdôm nua yôm bôh thâo mơng đưm djơ̆ tui jơlan gah pơsit mơ̆ amăng mông Jơnum bôh thâo đơ đam dêh čar thun 2021 Khua git gai Ping gah dêh čar ta ơi Nguyễn Phú Trọng hmâo črâo ba, anun lĕ bôh thâo lĕ bơngăt jua phun mơng djuai ania, bôh thâo pơčrang jơlan kơ mơnuih ƀôn sang lŏn ia nao hăng bôh thâo đưm dô̆ lĕ djuai ania dô̆. Anun lĕ hơdôm gru phun hloh mơ̆ ƀing gơmơi kiăng mơ-ĭt truh kơ abih bang tuai rơngoai lom nao čuă lăng bôh thâo đưm ƀơi tơring glông Kon Plông”./.