Ngă tui tơlơi pơkă kơ glai klô hiam, laih anun ƀơi kual pla sâm Ngọc Linh Kon Tum, ană plơi Tu Thó hrŏm hăng sa dua čô mơnuih tuh pơplai hmâo pơjing homestay, pơjing lu đang bơnga, phun kyâo hiam; pơjing grŭp atông čing hơgor hăng adôh suang, grŭp tơnă hơbai kơ tuai čuă ngui. Thun phrâo rơgao, plơi Tu Thó čơkă hmâo 5.000 wot čô tuai.

Amăng mông ngă lơphet lăi pơthâo Tơlơi pơsit mơ̆ng Jơnum min mơnuih ƀôn sang tơring čar Kon Tum tŭ yap plơi pơdŏng glăi phrâo Tu Thó, să Tê Xăng lĕ plơi tuai čuă ngui plơi pla, Jơnum min mơnuih ƀôn sang tơring glông Tŭ Mrông pơphun sĭ juă nua 1kg sâm Ngọc Linh, djru mơnuih ƀôn sang pơdŏng sang dlông čơkă tuai čuă ngui. Tal anai Gơnong bruă bôh thâo đưm bơkơjăp drơi jăn hăng tuai čuă ngui tơring čar Kon Tum ăt ƀơk brơi mơn ană plơi Tu Thó sa ring čing yôm. Bruă plơi Tu Thó ƀơi kual pla sâm Ngọc Linh Kon Tum dưi tu yap lĕ plơi tuai čuă ngui plơi pla pok tơbiă tơhnal pioh pơđĭ kyar bruă tuai čuă ngui hăng pơgang bôh thâo đưm mơ̆ng djuai ania Hơdang./.