Hăng akŏ ñu “Lâm Đồng-Dap Kơdư hing ang”, Rơwang hrơi tơjuh yôm phăn kơ bruă tuai čuă ngui Lâm Đồng him lăng pơphun mơ̆ng lơ 27/4 truh abih lơ 3/5 pơ anăp ƀơi djop tơring glông, plơi prong amăng tơring čar. Amăng anun, pơtum nao lu biă mă ƀơi plơi prong Đà Lạt, hăng lu bruă mă hiam kah hăng Jơnum lơphet adoh suang jar kmar; anih pơdă gơnam lăi pơthâo gru grua hiam djop djuai ania amăng tơring čar; Anih anom hơtŭk riă tơnă hơbai mơnong ƀong huă “Mơnong ƀong huă jơman hloh mơ̆ng Đag Lạt” pơdă rup hiam Plơi pla-Ană mơnuih mơnam Dap Kơdư-kual treng hang ia rơsĭ Tong krah; hơdră pơdah tơlơi adoh suang gru đưm hăng pơdah gru eng ao plơi pla sa gru hiam gah kual Dơnung lŏn Dap Kơdư.

Tui hăng yă Nguyễn Thị Bích Ngọc, Kơ-iăng Khua Gơnong bruă Gru grua boh thâo Pơrơguăt drơi jăn hăng Tuai čuă ngui Lâm Đồng, Rơwang hrơi tơjuh yôm bruă tuai čuă ngui thun anai kah hăng bruă ngă lir hơbit lu bruă ngă pơdah rai gru grua hiam mơak, pơrơguăt drơi jăn, pơjing rai gơnam kơ tuai hyu ngui ĕp lăng, tŭ mă kiăng pơhưč pran jua tuai amăng dêh čar hăng mơ̆ng tač rơngiao.