Kiăng pơđĭ tui boh tŭ yua amăng bruă wai lăng mơ̆ng kơnuk kơna, pơtrut bruă ngă hmua čơkă tuai hyu ngui ĕp lăng pơđĭ kyar hloh, Lâm Đồng hlăk čih pơkra tơlơi phiăn pơkă kơ bruă mă kiăng gêh găl. Yap truh ră anai, đơ đam hmua pioh brơi tuai hyu ĕp lăng tơring čar Lâm Đồng hơmâo 300 ha, rơnoh prăk tuh pơ alin truh 377 klai prăk.

Tui hăng Gơnong bruă gru grua boh thâo pơrơguăt drơi jăn tơring čar Lâm Đồng, tuai hyu ĕp lăng bruă ngă hmua mơnuih ƀôn sang pơphun mă hơjăn hăng jing anŏ pơhưč tuai hyu ngui ĕp lăng lu. Yua kơ anun, tơring čar hlăk gir run pơtrut kơtang bruă ngă pơgiong tơhnal pơkă wai lăng mơ̆ng kơnuk kơna kơ bruă anai, laih dơ̆ng ngă gêh găl pơtrut hơbô̆ bruă anai čơkă tuai lu hloh pơđĭ kyar hơđong kơñ pơgi anai.