Kiăng kơ djă pioh, lăi pơthâo anŏ hiam phara mơng eng ao mơnuih djuai ania ƀiă ƀơi kual Dap kơdư, amăng 2 hrơi mơng lơ 29 truh lơ 30/10, ƀơi tơring kual Măng Đen, tơring glông Kon Plông, tơring čar Kon Tum amra pơphun jơlan hơdră buh ao adai hăng eng ao mơnuih djuai ania ƀiă kual Dap kơdư yua Jơnum min mơnuih ƀon sang tơring glông Kon Plông gum hrŏm hăng mơnuih rơgơi čoh eng ao Minh Hạnh pơphun.

Sa, dua blah ao amra lăi pơthâo amăng jơlan hơdră buh ao adai hăng eng ao djuai ania ƀiă kual Dap kơdư

Jơlan hơdră buh ao adai hăng eng ao mơnuih djuai ania ƀiă kual Dap kơdư amra pơphun ƀơi 2 anih anun lĕ drai ia Pa Sỹ laih dong ƀơi glai kyâo hngo rok jơlan Hùng Vương, tơring kual Măng Đen, tơring glông Kon Plông, tơring čar Kon Tum. Nao ngui buh eng ao tal anai hơmâo 100 čô mơnuih lĕ ƀing mơnuih djuai ania ƀiă mơng djop plơi pla hăng 40 čô mơnuih thâo rơgơi.

Abih tih 200 blah ao adai, eng ao mơnuih djuai ania ƀiă hơmâo čoh hăng bơnal mơng hrĕ mrai Bảo Lộc hăng hơmâo čoh hiam, lăp djơ̆ hăng tơlơi hor ră anai yua mơnuih rơgơi čoh eng ao Minh Hạnh hrŏm hăng ƀing djru bruă gum hrŏm.

Anai lĕ sa amăng hơdôm bruă mă anăp nao hơdor glăi 110 thun akŏ pơjing tơring čar Kon Tum (9/2/1913-9/2/2023) hăng čang rơmang ba anŏ hiam phara mơng eng ao, pơđĭ kyar bruă mơñam mrai.