Tlam lơ 26/2, Khul khua apăn bruă git gai Ping gah Dak Lăk pơphun ngă lơphet mă yua Sang gru grua Ping gah tơring čar hăng Sang djuai ania Êđê. Ring bruă Sang glông Êđê hơmâo pơdong ƀơi lŏn Sang djă pioh gru đưm tơring čar Dak Lăk, prăk pơkra 6 klai 700 klăk prăk. Sang anai hơmâo 2 gưl, pơkra ƀơi lŏn prong 460m2, pơkra hăng kyâo soh. Ring bruă anai kiăng djă pioh, pơtrut tui gru grua boh thâo đưm, gru grua kơ tơlơi hơdip mơda mơng djuai ania Êđê.

Ring bruă Sang gru grua mơng Ping gah Dak Lăk ăt hơmâo pơkra hăng kyâo mơn, hrup tui sang glông kual Tây Bắc, prong 185m2, prăk man pơdong 10 klai prăk. Anai jing anih pơdă, djă pioh gru kơđi čar, rup, bruă mă mơng Ping gah tơring čar ăt kah hăng khua mua djŏp rơnuk; djru djă pioh hăng pơtrut tui gru hiam mơng đưm hlâo, jing “anih mriah” kơ bruă pơtô gru grua ngă hơkrŭ.