![VOV Tây Nguyên ruah mă/Siu H’ Prăk pơblang](/themes/custom/vov_4/images/avatar.png)
Nai tha prin, nai prin tha Nguyễn Phú Trọng, Khua hơđăp Anom kơsem min gru grua Ping gah, Bruă kơđi čar Hồ Chí Minh dêh čar ta lăi rơđah, găn rơgao bruă mă dưi hmâo Ping gah, Kơnuk kơna jao lu bruă apăn git gai phun yôm phăn khă bruă pơblang ƀudah ngă tui, Khua git gai Ping gah Nguyễn Phú Trọng leng kơ hmâo tơlơi tuh rơyuh prong biă, tơlơi anai dưi hmâo abih bang Ping gah, abih bang mơnuih ƀôn sang ta, yap wot lu gơyut gơyâo jar kơmar djă pioh, pơsit yôm:
“Anai lĕ Miđai hmâo mơ̆ng rơnuk Việt Nam tơpă mut hrŏm mơ-ak, Miđai Bôh Pơtŭ Kơñĭ pioh jao kơ mơnuih hmâo bôh than prong pioh kơ bruă ngă hơkrŭ Ping gah, Kơnuk kơna mơ̆ng lŏn ia mơ̆ hmâo lu tuh rơyuh amăng bruă mă mơ̆ ƀing mơnuih ba gru hlâo gơgrong, djă pioh hơdôm pran jua tuh rơyuh prong prin gum hơgôp lu mơ̆ng Khua git gai Ping gah dêh čar pioh kơ bruă mă mơ̆ng Lŏn ia ta".
![Khua git gai Ping gah Nguyễn Phú Trọng](https://vov4-media.solidtech.vn/sites/default/files/styles/large/public/2024-07/tong_bi_thu_nguyen_phu_trong_3_0_2.jpg)
Lăi rơđah pran jua gum hrŏm hơbit djuai ania hăng tơlơi đăo kơnang ha sa kơ bruă git gai mơ̆ng Ping gah Cộng sản Việt Nam pô ba akô̆ lĕ Khua git gai Ping gah Nguyễn Phú Trọng mơ̆ng lu gưl mơnuih ƀôn sang amăng đơ đam dêh čar hơdôm hrơi rơgao, yă Bùi Thị An, Khua Khul đah kơmơi thâo hră Hà Nội, Khua Khul đah kơmơi kơsem min bôh thâo phrâo mơ̆ng Khul mut phung ƀôn prong Hà Nội lăi pơthâo lơm hmư̆ hing Khua git gai Ping gah Nguyễn Phú Trọng čơkă mă Miđai Bôh Pơtŭ Kơñĭ tui jơlan pôr pơhing:
“Miđai Bôh Pơtŭ Kơñĭ Miđai dlông yôm hloh lŏn ia Việt Nam hơbin jao kơ Khua git gai Ping gah Nguyễn Phú Trọng jing pơdah tơlơi djă hơdor pioh mơ̆ng abih bang ping gah abih bang mơnuih ƀôn sang abih bang ling tơhan hăng Khua git gai Ping gah dêh čar”.
![Dô̆ hơnong rŭp pô git gai prong hloh mơ̆ng Ping gah jê̆ giăm hăng mơnuih ƀôn sang – mă mơ̆ng VOV](https://vov4-media.solidtech.vn/sites/default/files/styles/large/public/2024-07/tbt_voi_nguoi_dan_duar_kmal_daklak__1.jpg)
Lu tơlơi gum pơhiăp ăt pơsit, amăng 3 rơwang bruă rơgao, mơ̆ng Tal XI (thun 2011) truh ră anai, Khua git gai Ping gah Nguyễn Phú Trọng hmâo laih hơdôm tuh rơyuh prong prin hăng bruă pơđĭ kyar lŏn ia, biă ñu lĕ amăng rơnuk pơtrut kơtang măi mok, pơplih phrâo rơnuk anai, mut hrŏm jar kơmar, ngă tui bruă pơgang Lŏn ia amăng rơnuk phrâo. Biă ñu, Khua git gai Ping gah dêh čar hmâo tuh rơyuh prong laih gah bruă pơblang, hăng ring bruă kơpal kơsem min hăng hmâo thâo ƀuh anô̆ phrâo lĕ Tơlơi čih: “Sa dua tơlơi pơblang hăng ngă tui kơ kơnuk kơna djop mơnuih dưm kơnar hăng jơlan nao truh kơnuk kơna djop mơnuih dưm kơnar ƀơi Việt Nam”. Anai jing tơlơi klah čun lơm pơplih phrâo nao hrŏm hăng jơlan djop mơnuih dưm kơnar mơ̆ Wa Hồ hmâo ruah laih. Yua anun yơh, črăn apah bơni yôm hloh mơ̆ng Ping gah hăng Kơnuk kơna jao brơi kơ Khua git gai Ping gah Nguyễn Phú Trọng jing tơlơi djă pioh hăng pơsit yôm prong bruă tuh rơyuh mơ̆ng Khua git gai Ping gah dêh čar amăng lu bruă mă. Nai tha prin, nai prin tha Đào Duy Quát – Kơ-iăng Khua hơđăp Grŭp pơtô bruă Ping gah dêh čar pơdah pran jua:
“Ping gah, Kơnuk kơna ta lăi pơthâo tơlơi pơsit hăng ƀơk Miđai Bôh Pơtŭ Kơñĭ kơ Khua git gai Ping gah Nguyễn Phú Trọng lĕ sa tơlơi djă pioh mơ̆ng Ping gah, Kơnuk kơna hăng mơnuih ƀôn sang ta pioh kơ pran jua hăng hơdôm tơlơi gum hơgôp prong prin mơ̆ng ơi Nguyễn Phú Trọng pioh kơ bruă ngă hơkrŭ hăng bruă pơplih phrâo mơ̆ng lŏn ia ta, djuai ania ta; anai lĕ tơlơi djă pioh pran jua hăng tơlơi gum hơgôp prong prin phara hăng bruă ngă hơkrŭ mơ̆ng djuai ania ta”.
Ơi Y Nuel Niê, Khua buôn Akô̆ Dhong, phường Tân Lợi, plơi prong Buôn Ma Thuột, tơring čar Dak Lak mơ-ak lơm hmư̆ hing Ding jum kơđi čar hmâo tơlơi pơsit ƀơk Miđai Bôh Pơtŭ Kơñĭ kơ Khua git gai Ping gah Nguyễn Phú Trọng. Ơi Y Nuel pơdah pran jua:
“Khua git gai Ping gah Nguyễn Phú Trọng čơkă mă Miđai Bôh Pơtŭ Kơñĭ lĕ lăp djơ̆ biă. Pran jua prong hloh mơ̆ng ñu lĕ kơdŏng hưp ƀong kông ngăn mơ̆ kơdŏng glăi tañ, čuh djuh lĕ khom čuh tơl phun ñu. Truh ră anai jơlan hơdră kơdŏng hưp ƀong kông ngăn mơ̆ng ñu ba glăi bôh tơhnal prong biă".
Hmư̆ hing Ding jum kơđi čar Pơsit ƀơk Miđai Bôh Pơtŭ Kơñĭ kơ Khua git gai Ping gah Nguyễn Phú Trọng, ơi Trương Duy Cảnh, 70 thun, 44 thun ping gah, sang dô̆ ƀơi grŭp mrô 2, phường Lê Lợi, plơi prong Kon Tum, tơring čar Kon Tum, brơi thâo:
“Bruă Khua git gai Ping gah Nguyễn Phú Trọng dưi hmâo Kơnuk kơna ƀơk Miđai Bôh Pơtŭ Kơñĭ lăp djơ̆ biă. Pran jua Ñu lĕ pran jua mơ̆ng mơnuih cộng sản khăp kơ mơnuih ƀôn sang, yua kơ mơnuih ƀon sang. Biă ñu amăng bruă kơdŏng hưp ƀong kông ngăn mơ̆ng Ping gah hăng Kơnuk kơna mơ̆ ƀơi anăp wa Nguyễn Phú Trọng pô Khua Grŭp pơgang, pơgăn hưp ƀong kông ngăn mơ̆ng Ping gah, Ñu hmâo črâo ba khut khăt, pơsit pran, ƀu bĕ, ƀu yua kơ drơi pô, ƀu la mă kơ pô. Ñu mă bruă pioh mơnuih đăo kơnang, Ping gah hmư̆ tui, bruă bơwih ƀong mơnuih mơnam dưm kơnar pơđĭ kyar kơtang. Hơdôm rơnuk mơnuih apăn bruă kiăo tui tơdơi mơ̆ng Ping gah tâ̆o hloh hrăm tui, ngă tui kiăng djơ̆ hăng mơnuih ping gah, lăp djơ̆ hăng mơnuih apăn bruă, lăp djơ̆ hăng mơnuih amăng kơnuk kơna djop mơnuih dưm kơnar Việt Nam”.
![Ơi Trương Duy Cảnh, ƀơi phường Lê Lợi, plơi prong Kon Tum, tơring čar Kon Tum](https://vov4-media.solidtech.vn/sites/default/files/styles/large/public/2024-07/ong_truong_duy_canh__1.jpg)
Viết bình luận