VOV4.Jarai - Ƀơi Anom bruă Gru grua boh thâo đưm tơring čar Dak Lăk, Anom bruă Pơƀuh tơlơi adoh suang - Ding jum gru grua, bơkơjăp drơi jăn hăng tuai čuă ngui ngă hrŏm hăng Jơnum min mơnuih ƀon sang tơring čar Dak Lăk, Khul mơnuih pơčeh tơlơi adoh Việt Nam, Khul mơnuih apăn bruă suang Việt Nam phrâo pơphun jơnumj ngui tơlơi adoh sang đơ đam dêh čar ta tal 2 thun 2021.

Ngui ngor adoh suang dêh čar ta thun 2021 tal 2 hơmâo rơbêh 1000 čô mơnuih kơhnâo bruă adoh suang, mơnuih ngă sen rai mơng 22 anom bruă adoh suang amăng dêh čar. Rim anom bruă hơmâo rơkâo pơƀuh 1 črăn adoh suang sui mơng 65 truh 110 mơnit, anun lĕ adoh, suang, pĕ gong atông brô̆ ƀudah giao hưởng, ngă sen hơmâo jua gong brô̆, adoh hrŏm hăng grup pĕ gong brô̆ arăng iâu thanh xướng kịch. Mơng anai truh abih lơ 30/6, hơdôm grup amra pơplông či ruah mă grup rơgơi hloh laih anun brơi miđai.

Brơi bơnga hăng gơnam pơpŭ kơ hơdôm grup nao pơplông.

Tui hăng NSƯT Trần Ly Ly, Hơmâo jao ngă Khua Anom bruă Tơlơi rơgơi pơƀuh tơlơi adoh suang, Khua pơphun tơlơi jơnum ngui, tơdơi kơ lu thun pơdơi hĭ yua klin Covid-19 ngă, hơdôm grup adoh suang hơmâo pơplih tui laih, pơdah pran jua khăp kơ bruă, pơƀuh tơlơi rơgơi, tơlơi kơtưn, pran jua gum pơgôp prong mơng ƀing gơñu.

“Jơnum ngui adoh suang apăn bruă tơdơi kơ abih klin Covid-19 hơmâo pơwơ̆t glăi amăng tal 2 anai hăng 22 grup nao pơplông, hăng lu tơlơi klă hiam gum pơđĭ kyar boh thâo adoh suang ăt kah hăng pơtrut kơ tuai čuă ngui Việt Nam. Djŏp mơnuih prăp lui klă, ƀing apăn bruă adoh suang hơmâo pơdah abih pran jua hiam mơng ƀing gơñu. Kâo pơmin, hăng tơlơi klă hiam tui anai, jơnum tal anai amra ba glăi lu tơlơi truh kih, ăt kah hăng boh than prong biă”.

Grup Dak Lăk pơphun adoh suang hlâo.

Jơlan hơdră hơmâo ngă klă, hiam, hăng lu tơlơi adoh suang djă gru phara.

Tơdơi kơ hrơi pơphun, Grup adoh suang djuai ania tơring čar Dak Lăk pơphun pơƀuh tơlơi adoh suang. Hăng anăn “Hơdôm pok rup Bazan mriah”, grup Dak Lăk hơmâo pơƀuh 11 tơlơi adoh suang mơ-ak, djă gru djuai ania kual Dap Kơdư. Bruă prăp lui klă, adoh suang apăn bruă mơng ƀing rơgơi kơhnâo, mơnuih ngă sen wơ̆t hăng jua čêng, gong brô̆ jing ba glăi hrơi ngui ngor mơ-ak amăng pran jua, hơmâo lu mơnuih dŏ lăng, pah tơngan. Pô adoh Y Hoắt Byă, grup adoh suang djuai ania Dak Lăk lăi:

“Adơi ayong hơmâo gir abih pran jua laih amăng hrơi ngui ngor pơƀuh tơlơi adoh suang hrơi anai, ta phrâo adoh đôč arăng pah tơngan yơh, jing ngă ta tlao hok, adoh abih pran hloh”.

H’ Xíu: Čih - Siu H’Mai: Pơblang