Ƀơi kual čư̆ siăng Yŭ tơring Quảng Ngãi, neh met wa djŏp phung djuai ngui huă pơsat Pơtao Hùng, anăp nao anih amĭ ƀă yă pơjing, pơhưč lu tuai rơnguai nao ngui. Rơngiao kơ nao čuă lăng anih anom hiam, pel ĕp sem lăng gru grua djŏp djuai ania amăng plơi, lu tuai rơnguai pioh mông nao pơ anih anih ngă yang Pơtao Hùng, kah hăng Pra yang Đình Lương Khế phường Kon Tum, pra yang Kỳ Quang, să Đăk Hà, kiăng gum hrŏm mơnuih ƀôn sang tŭi ñang hơdor glăi kơ ơi yă ta đưm. Amai Y Kha, ƀơi să Đăk Mar, brơi thâo: “Ƀing gơmơi nao atông, ayun suang hơdor glăi hăng pơpŭ kơ tơlơi gum djru prong prin mơ̆ng ơi yă ta đưm hăng plơi pla, lŏn ia”.

Ƀơi Anih gru đưm dêh čar Đình Lạc Giao, phương Buôn Ma Thuột, gong gai hăng mơnuih ƀôn sang tơring čar Dak Lăk pơphun prong biă hrơi Huă pơsat Pơtao Hùng pơpŭ kơ djŏp Pơtao Hùng akŏ pơdong lŏn ia. Hrơi ngă yang huă pơsat hơmâo pơphun amăng hrơi mông kơdrưh kơ-ang, blung a lĕ taih hơgor, atông čing tui tơlơi phiăn đưm; tŭi ñang, brơi gơnam pơyơr đĭ mơ̆ng mơnuih ƀôn sang ƀơi Dak Lăk; ngă yang lăi pơhmư̆, pơđok hră hơdor glăi gru phun hing ang mơ̆ng djuai ania ta. Pơ anai, ăt hơmâo bruă čih boh hră hiam arăng lăi thư pháp, pơƀuh gơnam ƀong huă đưm, adoh chèo, quan họ, pơbưp grup pĕ goong tính, adoh then...laih anun pơdă gơnam OCOP mơ̆ng Dak Lăk.

Ƀơi pra yang Âu Cơ, či kơčong čư̆ Phượng Hoàng, gah Anih čuă ngui drai ia Prenn Đà Lạt, tơring čar Lâm Đồng pơphun prong mơn hrơi Huă pơsat Pơtao Hùng, pơhưč lu tuai rơnguai hăng mơnuih ƀôn sang nao ngui. Tơdơi kơ ngă yang ba nao gơnam, pơyơr kơ Ơi yă pơjing lŏn ia, hăng ngă yang tui phiăn juăt, khua mua hăng mơnuih ƀôn sang tơring čar Lâm Đồng hrŏm hăng ƀing tuai mơ̆ng ha čô nao tŭi ñang kơ Ơi yă pơjing lŏn ia. Pơ anai ăt hơmâo mơn tơlơi ngui adoh suang, ngui cờ tướng, đĭ gong pik ia rơmă, teng gŏ lŏn, sang čơ pơdă gơnam ƀong huă, anih pơƀuh ia če Việt Nam, thư pháp, hăng pơdă prưng rup...pơƀuh glăi gru hiam mơ̆ng đưm sô.

Ƀơi pra yang Pơtao Hùng pơ guai dêh čar Tuy Đức, tơring čar Lâm Đồng, neh met wa djŏp djuai ania pơphun ngui huă pơsat Pơtao Hùng. Pra yang yua ană plơi Phú Thọ man pơdong mơ̆ng thun 2018 ƀơi anih prong rơbêh 2.100m2. Anai jing anih hơmâo lu bruă lăng glăi hơdor kơ ơi yă ta đưm, djă pioh hăng pơtrut tui gru đưm, djru ngă kjăp tui khul gum pơgôp djuai ania ƀơi guai dêh čar. Ơi Chử Anh Chương, mă bruă amăng Khul wai lăng pra yang Pơtao Hùng ƀơi Tuy Đức, brơi thâo: “Abih bang leng kơ pơđing pran jua kơ anih amĭ ƀă yă pơjing, tơlơi pơmin mơ̆ng neh met wa ƀing ta lĕ: Mah nao pơ ngŏ, trun pơ yŭ, hơdor hrơi huă pơsat Ơi Pơtao đưm lơ 10 blan 3 lĕ ta pơwơ̆t glăi”. Neh met wa hlơi hlơi leng kơ pơmin hnun soh”.

Hrơi anai, neh met wa mơ̆ng plơi Phú Thọ glăk dŏ hơdip pơ hơdôm boh să gah Yŭ Gia Lai pơƀut glăi pơ Pra yang Pơtao Hùng ƀơi phường Pleiku, ngă yang čuh ñang. Pơ anai, hơmâo hơdor glăi kơ ơi yă pơjing rai lŏn ia, neh met wa pơtă pơtăn kơ tơdruă kiăng ngă tui klă tơlơi pơtrun mơ̆ng Ping gah hăng kơnuk kơna, laih anun pơƀut bơwih ƀong, akŏ pơjing tơlơi hơdip hiam amăng plơi pla. Ơi Đỗ Xuân Thu, khul pơtruh hiăp mơnuih mơ̆ng plơi pla Vĩnh Phú ƀơi tơring čar Gia Lai brơi thâo: “Rim thun yơh gơmơi ngă yang hơdor kơ Pơtao Hùng, Ơi pơtao mơ̆ng abih bang djuai ania Việt Nam. Gơmơi pơ-ư pơ-ang biă lơ̆m jing ană mơnuih amăng plơi pla Ơi Pơtao, pran jua hyôk hyak biă”.