Hăng mơnuih ƀôn sang kual Dap Kơdư, mah aka ƀu bưp djơ̆ Wa Hồ ha wơ̆t ôh samơ̆ amăng pran jua rĭm čô pơƀuh rup rap Wa hăng hơdôm tơlơi ră ruai kơ Wa hơmâo jă đôm amăng pran jua. Ƀơi kual hơkrŭ đưm tơring glông Krông Bông, hơmâo boh pơhiăp, bruă mă mơ̆ng Wa đưm hlâo, dưi hơmâo mơnuih ƀôn sang ngă tui amăng tơlơi dŏ dong ƀong huă rim hrơi. Ayong Y Phang Ƀyă, dŏ pơ Ƀuôn Krông, să Ea Trul, tơring glông Krông Bông brơi thâo:

“Kâo arăng tơkeng rai lơ̆m lŏn ia ta rơngai laih, kâo aka ƀu bưp djơ̆ Wa Hồ ôh, samơ̆ amăng tơlơi hơdip mơda rim hrơi mơ̆ng kâo lĕ kâo khăp ƀu eng hăng pơpŭ biă mă kơ Wa yua kơ Ñu jing sa čô mơnuih ngă khua rơgơi kơhnâo prong prin hing ang. Yua kiăng hrăm hăng hal tui Wa Hồ anun rim kơ bruă mă amăng djop hrơi mông ăt amăng tơlơi dŏ dong ƀong huă, jĕ giăm pơhiăp hrŏm djop mơnuih, kâo ƀuh khom gir run hrăm tui Wa dơ̆ng mơ̆ng bruă anet aneo hloh, boh nik ñu pơđĭ kyar bơwih ƀong huă amăng sang anŏ, djru hrŏm man pơdong plơi pla, djru ba ƀing tơnap tap amăng plơi pla”.

Hăng mơnuih ƀôn sang djŏp kual plơi pla čơkă Hrơi rơngai lŏn ia, amăng hơdôm hrơi anai, neh met wa djuai ania Bahnar ƀơi djŏp plơi pla jê̆ ataih či tơring čar Gia Lai ol kơdol hning kơ Wa Hồ dong laih, mơnuih ba glăi tơlơi rơngai kơ djuai ania Việt Nam. Tha plơi Yơu, plơi Ktu, să Kon Gang, tơring glông Đăk Đoa ră ruai:

“Lăi nao kơ Wa, mơ̆ng čơđai truh kơ ƀing tha hlơi mơ̆ng ƀu thâo. Wa Hồ jing sa čô mơnuih hơmâo tơlơi pơmin prong samơ̆ hơdip kar hăng ană plơi mơn, sa čô khua prong prin mơ̆ng lŏn ia ta. Mah aka ƀu bưp djơ̆ Wa ôh, samơ̆ amăng pran jua ƀing ta lêng kơ pơmin hơmâo Wa Hồ dŏ hrŏm, hơmâo Wa lăng tui djŏp bruă ƀing ta ngă. Mơ̆ng anun yơh, hlơi hlơi lêng kơ gir hrăm, ngă tui tơlơi hiam klă mơ̆ng Wa, hơdor na nao tơlơi Wa pơtô kiăng bơwih ƀong pơkra gơnam. Mơ̆ng anun pơjing pran kơtang amăng bruă bơkơtưn khăp kơ lŏn ia hăng lu bruă ngă sit nik kah hăng ngă pơdai dua bơyan, pla kơphê klă, gum pơgôp ha pran jua...Laih anun rim thun gơmơi ăt pơphun mơn hrơi pla kyâo “Hơdor bơni na nao kơ Wa”