Mơnuih rơgơi kơhnâo Y Du Êban brơi thâo, ăt ƀu thâo mơng hơbin lơi jua čing hơgor pơmut amăng akŏ dlô. Ñu kơnong hơdor hơdip truh prong giong mơnuih hrŏm hăng jua čing hơgor mơng ơi yă, jua čing jring jring kar hăng jua ia krông, kar hăng čim brĭm ur amăng glai rưng. Lơm dŏ čơđai, ñu juăt hmư̆ jua čing hơgor amăng bơyan ngui ngor, ngă yang rơbang, hăng yua kơ pran hor ñu tañ thâo hơdôm tơlơi adôh atông hrŏm čing hơgor hăng hơdôm tơlơi adôh rơnang mơ-ak hloh.

“Kâo hmư̆ lu tơlơi adôh atông hrŏm čing hơgor amăng bơyan ngui ngor amăng plơi pla hăng jua čing pơmut đŏm amăng pran jua kâo, yua kơ kâo lêng kơ dŏ giăm anih arăng atông kiăng kơ hmư̆ tong ten. Hơmâo met wa brơi kâo atông hrŏm hăng kâo hor biă mă. Kâo thâo atông čing lơm dŏ hlăk ai. Lu mơnuih rơgơi kơhnâo ƀuh kâo thâo atông tơdơi anun pơmut kâo amăng grup atông čing hăng pơtô glăi mơnuih pơkŏn hrăm atông čing”.

Mơng đưm hlâo, amăng hơdôm hrơi ngui ngor, ngă yang rơbang amăng plơi pla, jua čing hơgor lĕ kiăng pơtruh nao rai pran jua ană mơnuih hăng yang rơbang, pơlir abih bang ană plơi pla. Yua anun yơh, jua čing lĕ bơngăt amăng plơi pla. Lơm ƀuh gru grua čing hơgor glăk ƀơƀrư̆ rơngiă tui, ơi Y Du Êban hơmâo pioh mông kiăng pok anih pơtô hrăm brơi ƀing čơđai amăng plơi pla. Lu čơđai amăng plơi pla thâo atông čing hăng dưi hyu atông ngui lu anih. Ơi Y Du Êban brơi thâo:

“Amăng plơi kâo lĕ mơnuih thâo ruă čing, pơtô atông čing brơi mơnuih amăng plơi kiăng gum hrŏm djă pioh jua čing hơgor hăng lơ̆m nao ngui adôh suang pơpă kâo lêng kơ nao hrŏm grup čing hơgor soh. Kâo ăt pơtô brơi ană tơčômơng 15-16 thun hăng grup čơđai anet ăt hơmâo pă rơma wŏt nao atông ngui hrŏm”.

Kiăng kơ dưi ngă tui anai, ơi Y Du Êban ƀu hŭi tơnap tap ôh, hrŏm hăng ƀing rơgơi kơhnâo amăng plơi pla pơhrăm na nao hơdôm tơlơi adôh, pioh hrơi mông đing nao pơtô brơi ƀing čơđai anet, hluai tui hơdôm bơyan pơdơi prong lĕ hrơi mông lăp djơ̆ hloh. Ñu ăt nao tơl rĭm boh sang anŏ, pơtrut pơsur ƀing amĭ ama hăng ƀing čơđai anet nao hrăm. Yua kơ abih pran jua kiăng djă pioh jua čing hơgor yua anun ơi Y Du Êban kah mơng dưi ngă tui ră anai hăng hơmâo lu hlăk ai čơđai hor jua čing hơgor djuai ania pô.

“Anih pơtô hrăm brơi ƀing čơđai anet hơmâo dua anih A, B. Ră anai ƀing čơđai mut sang hră laih yua anun tơnap biă kiăng pơtô hrăm brơi. Kâo pơmĭn ngă hiưm păn kiăng ƀing čơđai thâo atông čing, huăi ngă rơngiă hĭ gru grua hiam klă mơng djuai ania pô. Tui tơlơi hơdip phrâo ră anai hơdôm gru grua hiam sô hơđăp amra rơngiă hĭ mơtăm. Kâo čang rơmang lơm dŏ găn añrăng amra pơtô brơi ƀing čơđai hrăm tui”.

Čing hơgor hăng mơnuih djuai ania Êđê ƀu djơ̆ kơnog gông brô̆ đôč ôh mơ̆ ăt jing kông ngă yôm dưi plih hơdôm drơi kơbao, rơmô, lĕ gơnam yôm amăng sang anŏ. Jua čing hơgor dik dak kiăo tui thun blan hơdip kơ ƀing tơdăm dra muai djuai ania Êđê, mơng hrơi tơkeng truh kơ hrơi glăi pơ ơi yă. Ơi Y Du Êban brơi thâo kiăng jua čing hơgor hmư̆ na nao kiăng hơmâo tơlơi gum hrŏm mơng neh met wa amăng plơi pla kah hăng gong gai djop gưl.

“Tơdah kơnong sa boh sang anŏ gơmơi pơphun pơtô hrăm brơi amra ƀu dưi djă pioh jua čing hơgor djuai ania pô ôh. Kiăng hơmâo tơlơi gum hrŏm mơng khua plơi, gong gai. Hơdôm tơlơi gum tơngan hrŏm mơng abih bang hăng ƀing rơgơi kơhnâo dong. Kâo čang rơmang ƀing čơđai amra thâo hăng lăng yôm gru grua djuai ania pô”. Yua thâo hluh tong ten jua čing hơgor, thâo ruă čing hrŏm hăng tơlơi gum pơgôp prong prin amăng bruă djă pioh, lăi pơthâo čing hơgor mơng djuai ania Êđê, ơi Y Du Êban hơmâo tŭ mă lu hră pơpŭ mơng djop gưl. Anai lĕ hơdôm tơlơi pơpŭ lăp djơ̆ kiăng pơsur pran jua ƀing rơgơi kơhnâo kar hăng ñu đah mơng tŏ tui pran hor, kiăng jua čing hơgor dưi hmư̆ na nao./.