Čing mơng djuai ania Jarai juăt tol jing hơdôm ring, rĭm ring čing hơmâo mơng 3 boh čing pơ glông, anet prong phara mơn; čing anet prong mơng 10-15 cm, amăng anun čing ania lĕ čing yôm hloh. Ơi Kpă Y Chua, dŏ ƀơi ƀuôn Treng, să Ea H’Leo, tơring glông Ea H’Leo, tơring čar Dak Lak brơi thâo: mơnuih djuai ania Jarai ƀơi Ea H’Leo hơmâo lu ring čing phara anun lĕ čing Mnom, čing Arap, čing Trum, čing Wang. Rĭm ring čing anai juăt atông phara amăng tơlơi hơdip mơda, juăt atông amăng hơdôm hrơi ngui ngor hăng ngă yang phara. Ring čing Mnom lơ̆m atông amra dŏ ha anih, bơ ring čing Arap atông hơmâo mơnuih ayun suang, yua anun čing Arap arăng juăt iâu lĕ ring čing Suang. Kpă Y Chua brơi thâo:

“Čing hơgor yôm biă mă amăng tơlơi hơdip mơda kơ mơnuih djuai ania ƀiă, sit biă ñu hăng mơnuih djuai anai jarai ƀing gơmơi juăt yua biă mă. Yua anai bơdjơ̆ hăng rơwang hơdip kơ ană mơnuih. Hơmâo lu ring čing anun lĕ čing Mnom, čing Arap hăng čing Arap pơplih phrâo. Ƀing gơmơi juăt yua tui anai, čing Mnom lĕ atông amăng mông ngă yang, hlâo kơ mông ngă yang arăng juăt atông kiăng lăi pơthâo brơi mơnuih ƀon sang thâo prap lui nao ngă yang”.

Čing lĕ gông brô̆ pơlir hơbit amăng tơlơi hơdip mơda, gru grua, hrơi ngă yang rơbang mơng djuai ania Jarai. Lơ̆m pơphun hơdôm hrơi ngă yang hăng ngui ngor khŏm atông čing. Jua čing hơgor amra pơtrut pran jua, pran kơtang, lĕ bơngăt amăng hơdôm hơi ngă yang rơbang mơng djuai ania Jarai. Yua tơlơi yôm phara mơng čing hơgor yua anun mơnuih djuai ania Jarai ƀơi anai ƀu pơdơi gir run djă pioh hăng pơtô atông čing hơgor brơi ană tơčô. Ơi Kpă Y Chua brơi thâo dong:

“Amăng plang internet, amăng tivi, kâo ăt kiăng lăi pơthâo brơi abih bang mơnuih ataih giăm aka ƀu thâo, aka ƀu hmư̆. Tơdơi anai ană tơčô ăt thâo djă pioh gru grua yua čing hơgor djă pioh jua hơdip kơ ană mơnuih, lơ̆m atông čing hơgor ngă kơ abih bang mơnuih adôh tui, amăng pran jua mơnuih Jarai, hlơi hlơi lêng kơ hluh rơđah jua čing hơgor”.

Lăi nao gru grua yôm phara mơng čing hơgor amăng tơlơi hơdip mơda kơ mơnuih djuai ania Jarai ƀơi tơring glông Ea H’Leo, ơi Nguyễn Huy Dũng, Khua anom bruă gru grua, pôr pơhing tơring glông Ea H’Leo brơi thâo, tơlơi hơdip mơng neh met wa djuai ania Jarai ƀơi anai dŏ lu tơnap tap samơ̆ ƀing mơnuih rơgơi kơhnâo ƀơi anai lêng kơ lăng yôm gru grua djuai anai pô hăng ƀing gơñu hrŏm hăng gong gai ƀon lan gir run amăng bruă mă kiăng pơhlôm brơi ană tơčô thâo jua čing hơgor mơng djuai anai Jarai. Ơi Nguyễn Huy Dũng brơi thâo:

“Hăng gru grua čing hơgor ƀơi tơring glông Ea H’Leo hơmâo mơnuih djuai ania Êđê hăng Jarai. Hăng mơnuih djuai ania Jarai ƀơi Ea H’Leo hơmâo lu gru grua yôm phara, amăng tơlơi hơdip mơda juăt atông čing hơgor. Čing mơng djuai ania Jarai hơmâo čing Arap hăng čing Arap pơplih phrâo. Kiăng hơkrŭ amăng djă pioh čing hơgor, ƀing gơmơi hơmâo ngă tui lu hơdră. Ƀing gơmơi bưp neh met wa pel ĕp gru grua mơng ƀing gơñu hăng ƀing gơñu khŏm pơmĭn ngă hiưm pă kiăng djă pioh. Amăng plơi pla hơmâo lu mơnuih rơgơi kơhnâo khăp gru grua ƀing gơñu yua anun lơ̆m pok pơhai ăt gêh gal mơn. Pơ anăp anai ƀing gơmơi amra pok dua anih pơtô atông čing hơgor amăng plơi anai hăng hơdôm anih pơkŏn amăng đơ đam tơring čar. Čang rơmang ƀơƀrư̆ tŭ yua amăng bruă djă pioh klă ƀiă ră anai”.

Čing lĕ kông ngă yôm phăn mơ̆ mơnuih djuai ania Jarai amăng kual lŏn anai djă pioh glăi mơng rơnuk ơi yă. Jua čing hơgor dik dak, dui amăng abih mơnuih jê̆ giăm ƀiă dong, pơlir kơplah wah ană mơnuih hăng yang rơbang, glai rưng, apăn tơngan jum dar ayun suang tui jua čing hơgor.