- Ơ ơi Alíp! Hok mơ-ak biă mă dưi bơră ruai hăng ih amăng črăn hơdră gru grua hiam djop djuai ania kual Dap kơdư hrơi anai. Ih dưi lăi pơthâo mơn, čing hơgor yôm hiưm pă amăng tơring hơdip kơ mơnuih djuai ania Bahnar ?

- Ơi Alip:“Blung hlâo kâo hơmâo tơlơi kơkuh kơ abih bang, tơlơi pơpŭ bơni hăng neh met wa hmư̆ brô̆…Čing hơgor yôm phăn biă mă amăng tơlơi hơdip mơda ăt sui mơng đưm đă ră hlâo laih. Anŏ yôm mơng čing hơgor lĕ mơng hrơi mông atông ngui, anun lĕ amăng hrơi ngui ngor prong, amăng hrơi mơyut jôk, amăng hrơi ngă yang rơbang anun lĕ trom kơbao, ngă yang čuh hơtă aseh…lêng kơ atông čing soh. Hăng đưm hlâo adih, kơnong sang anŏ pơdrong asah kah mơng hơmâo čing hơgor, sa ring čing plih hơdôm drơi kơbao, rơmô mơtăm…Čing hơgor juăt yua hrŏm amăng plơi pla, yua anun arăng lăng yôm biă mă”.

- Năng ai ñu, ih thâo rơđah hloh anŏ yôm mơng čing hơgor, yua anun pơlir hơbit hăng čing hơgor mơng dŏ anet, jing gơnam hor yua amăng tơlơi hơdip mơda, djơ̆ mơn ?

- Ơi Alíp:“Jua čing hơgor kiăo tui kâo mơng anet truh ră anai, jua čing ngă kâo hơdor nao hơdôm hrơi ngă yang anun lĕ ngă yang pơthi….kâo pô ăt hrăm glăi mơng ƀing ơi, ama, anong met wa anun kah thâo atông tui ră anai, kâo juăt kiăo tui ƀing gơñu nao atông amăng hơdôm hrơi ngă yang rơbang, ngă yang pơthi, hrơi ngă yang hơget kiăng atông čing kâo lêng kơ kiăo tui soh…”

- Dơnun! Mơng hrơi ngă yang, ngui ngor anun, ih dưi hrăm atông čing hăng mut hrŏm amăng hơdôm tơlơi adôh suang ? Pran jua ih lăng mơ-ak mơn ?

- Ơi Alíp:“Amăng hơdôm bơyan ngui ngor, lơm hmư̆ jua čing, abih bang mơnuih amra tui nao mơtăm, atông čing, ayun suang hrŏm, mơ-ak biă mă, sit biă ñu amăng hrơi ngă yang pơthi lĕ mơ-ak hloh…yua anun kiăng dŏ tơguăn truh mơmŏt mlăm kah mơng dưi atông čing. Blung hlâo ƀing mơnuih thâo atông amra atông hlâo, yua lơm anun hơmâo lu dra ayun suang, ƀing tơdăm hlơi hlơi lêng kơ kiăng pơdah tơlơi thâo thăi mơng ƀing gơñu yua anun kiăng sua mă atông lơm anun ƀu dưi hlơi, dŏ tơguăn truh mlăm, lơm arăng măt tơpai, ƀu anăm atông dong tah, lơm anun amra hơmâo mơnuih pơtô brơi atông, kâo hrăm tui ƀơƀrư̆. Dua dong lĕ lơm kơƀah mơnuih, ƀing gơmơi rơkâo atông hrŏm, atông hơdôm čing anet, atông amuñ hloh ƀơƀrư̆ kah atông čing prong, atông tơnap tui truh thâo atông kar ră anai”.

- Hnun hă! Tui pran hor hăng gir hrăm tui arăng, găn rơgao hơdôm hơpluh thun, năng ai ñu dưi hrăm hăng djă pioh lu tơlơi adôh mơng čing hơgor ?

-Ơi Alíp:“Kâo pô dưi atông lu tơlơi adôh suang, wŏt hơdôm tơlơi adôh đưm kah hăng hơdôm tơlơi adôh phrâo ră anai. Anun lĕ amăng hơdôm hrơi ngă yang rơbang, hrơi ngă yang pơthi amra atông tơlơi adôh dik dak mơ-ak, bơ amăng hơdôm hrơi ngă yang trom kơbao, pơyơr đĭ yang mơnong rơmô, aseh amra yua hơdôm ring čing anet. Atông čing amăng hrơi ngă yang trom kơbao kar hăng atông čing amăng hrơi đĭ dŏ sang drông. Sit biă ñu atông tơlơi adôh đưm ăt dŏ lu mơn, bơ hơdôm tơlơi adôh phrâo ră anai, anun lĕ atông tơlơi adôh Jarai, hmư̆ mơ-ak biă mă mơn, hăng hơdôm hơpluh tơlơi adôh”.

- Kiăng hơdôm tơlơi adôh juăt atông anai huăi rơngiă tui, tui ia pơmĭn kiăng ngă hiưm pă kah dưi pơtô glăi rơnuk tơdơi ?

-Ơi Alíp:“Kâo hơmâo pơtô atông čing giăm 11,12 thun laih. Mrô čơđai kiăo tui hrăm, hơmâo jao hră pơsit lĕ ƀing hlăk ai kơhnâo amăng plơi pla giăm 40 čô. Ră anai ƀing gơñu juăt mut hrŏm amăng atông amăng hrơi ngui ngor. Kâo čang rơmang rơnuk tơdơi dưi djă pioh na nao hơdôm tơlơi adôh mơ-ak mơng ơi yă, yua anun kâo gir run pơtô glăi, črâo ba atông lu tơlơi adôh kiăng ƀing gơñu djă pioh kjăp, wŏt atông čing, gông T’rưng ƀudah gông Ting ning dong...”.

- Hai, bơni kơ ơi Alíp hơmâo pioh mông bơră ruai hăng ƀing gơmơi hŏ!