Hăng pran hor mơng dŏ hlăk ai, giăm 50 thun anai, mơnuih kơhnâo kơhnăk Kpă Huăt lêng abih pran jua mă bruă, hrŏm hăng tơlơi pơčeh yôm phara, ñu dưi pơjing hơdôm ƀĕ kyâo gal jing hơdôm rup trah hiam hơmâo bơngăt laih dong pơdah gru grua yôm mơng djuai ania Jarai. Ơi Kpă Huăt brơi thâo, kiăng kơ trah rup mơng hơdôm kyâo gal, khăng ƀu djơ̆ amuñ ôh, mơ̆ kiăng hơmâo pran hor, tơlơi gir run hăng thâo pơčeh. Anai lĕ bruă ƀu hơmâo hlơi pơtô brơi mơ̆ dưi ngă mơng mơta thâo lăng tui anong neh wa trah, tơngan kơđeng rơmoăn hăng đing nao abih pran amăng rup trah. Ơi Kpă Huăt brơi thâo:

“Lơm kâo trah rup kyâo, kâo pơmĭn nao hơdôm rup kâo hơmâo trah laih hlâo anun. Ƀu hơmâo hlơi pơtô brơi kơ kâo samơ̆ yua pran hor, tơlơi gir run kah mơng dưi trah jing rup tui tơlơi hor. Anai lĕ gru grua hiam mơng djuai ania gơmơi, Đưm hlâo adih, neh met wa juăt pơdong hơdôm rup trah anai jum dar pơsat”.

Ơi Kpă Huăt juăt trah lu rup kyâo pơdong amăng pơsat. Lơm lăng nao hơdôm rup trah, ƀoh, khuer hiam, hlơi hlơi lêng kơ ƀuh pran khăp mơng ñu hăng bruă trah rup tui gru grua djuai ania pô. Tơngan kơđeng trah tong ten tui rĭm glông rup trah sa čô đah kơmơi gôm ƀô̆ mơta hia yua hning rơkơi ñu, ơi Kpă Huăt brơi thâo hơdôm rup trah anai pơdah pran khăp mơng mơnuih dŏ hơdip hăng mơnuih rơngiă laih. Anai lĕ pran khăp yôm biă mă, jê̆ giăm hăng pơlir hăng tơlơi hơdip rĭm hrơi mơng mơnuih rơngiă lơm dŏ hơdip.

“Tal trah rup amăng hrơi ngui ngor hlâo anun, kâo trah rup pơdong amăng pơsat, rup trah đah kơmơi gôm ƀô̆ mơta hia hning rơkơi amăng hrơi ngă yang pơthi. Lu wŏt amăng tơring kual trah rup đah kơmơi pi ană. Lu mơnuih hor hơdôm rup yua kơ kâo trah. Kâo trah rup ƀu djơ̆ sĭ mlia ôh mơ̆ kiăng ană tơčô thâo yua ră anai ƀiă đôč mơnuih thâo trah rup”.

Lơm lăng nao hơdôm rup trah pơhưč mơnuih nao lăng, hlơi hlơi lêng kơ pơ-ư ang pô trah rup anai. Amăng plơi pla tơdah kiăng rup trah, ñu amra trah brơi mơtăm ƀu djơ̆ sĭ mlia ôh mơ̆ kiăng neh met wa pơ-ư ang gru grua hiam mơng djuai ania pô, ană tơčô ƀuh, hrăm tui kiăng djă pioh hăng lăi pơthâo. Kiăng bruă trah rup dưi lăi pơthâo, ƀu ƀu djơ̆ kơnong pơtô glăi ană tơčô amăng sang đôč ôh, mơ̆ kiăng pơtô brơi ƀing hlơi hor dong. Pơmĭn nao kơ bruă pơtô glăi, djă pioh rup trah, ơi Kpă Huăt brơi thâo:

“Ră anai ăt hơmâo lu hlăk ai čơđai amăng plơi pla kiăng hrăm tui bruă trah rup, tơdơi anai kâo glăi pơ ơi yă, kiăng mơn ană tơčô tŏ tui bruă trah rup pioh glăi mơng ơi yă anai. Ƀing čơđai amăng plơi nao hrăm kâo ăt črâo brơi mơn. Kơ bruă pơtô hrăm kiăng hơmâo gong gai ƀon lan tuh pơ alin lăp djơ̆. Kâo pơmĭn amra pơtô glăi ană tơčô thâo. Tơdah ta ƀu pơtô glăi, ană tơčô amra ƀu thâo dong tah. Kâo amra pơtô brơi hơdôm rup trah amuñ”.

 Ƀơƀrư̆ pơ anăp dong, tơlơi hơdip pơplih phrâo, ƀiă đôč mơnuih đing nao bruă trah rup. Kiăng bruă trah rup djă pioh na nao kiăng gum tơngan hrŏm mơng ƀing hlăk ai, ƀing gơñu kiăng lăng hor anŏ yôm phara mơng rup trah. Laih dong ƀing kơhnâo kơhnăk, mơnuih thâo pơčeh kar hăng ơi Kpă Huăt amra gum hrŏm kiăng bruă trah rup mơng djuai ania Jarai djă pioh na nao./.