Yua kơ anun yơh, bruă djă pioh, pơđĭ tui, lir hơbit hăng bruă tuai hyu ngui lĕ jing anŏ gêh găl pioh kơ er tơlơi adoh suang đưm dưi djă pioh hăng ngă pơhơdip glăi ñu amăng tơlơi dŏ dong ƀong huă rĭm hrơi laih anun jing gơnam sĭ mơdrô kơ tuai hyu ngui pơhưč pran jua hloh, pơjing anŏ ĕp prăk kăk, pơhrui glăi kiăng pơsir tơlơi kơƀah amăng tơlơi hơdip mơda mơnuih ƀôn sang. Khă tui anun, kkiăng hơdôm er tơlơi adoh đưm plơi pla anai dŏ na nao sit mơ̆n bưp ƀuu ƀiă tơlơi tơnap tal gleh glar.

Ding jum gru grua Pơrơguăt drơi jăn hăng Tuai čuă ngui hơmâo ngă hră pơtrun kơ bruă akŏ pơjing Kơčăo bruă djă pioh, rŭ glăi hăng pơđĭ tui rơnoh yôm adoh đưm, suang amăng plơi pla, gông brô̆ mơ̆ng djop djuai ania ƀiă, lir hơbit hăng pơđĭ kyar bruă tuai čuă ngui mơ̆ng thun 2021-2030. Rĭm djuai ania, tơlơi adoh đưm, yut suang le boh tơhnal ia rơgơi tơlơi kơhnâo tơbiă mơ̆ng rai tơlơi pơmin pran jua amăng gru grua hiam, gru phun dêh čar, ia rơgơi tơlơi dơlăm biă mă.

Tui hăng Ding jum Gru grua, Pơrơguăt drơi jăn hăng Tuai čuă ngui, Kơčăo bruă dưi akŏ pơjing kiăng pơtong glăi bruă ngă djă pioh pơgang rŭ glăi hăng pơđĭ tui rơnoh yôm tơlơi adoh đưm, yut suang amăng plơi pla, gông brô̆ mơ̆ng djop djuai ania ƀuă, lir hơbit hăng bruă pơđĭ kyar tui čuă ngui. Mơ̆ng anun, rơkâo đĭ hăng lu hơdră pok pơhai, mă yua, pơđĭ tui rơnoh djă pioh ba glăi boh tŭ yua sit nik.

Khă tui anun, pioh bơwih brơi kơ bruă ngă anai, ăt bưp lu tơlơi tơnap. Yă Nguyễn Thị Hải Nhung, Khua anom wai lăng Gru grua djuai ania, Ding jum Gru grua, Pơrơguăt drơi jăn hăng Tuai čuă ngui brơi thâo:

“Yua tơlơi thâo hră mơ̆ng mơnuih ƀôn sang ƀu bơkơnar ôh, anun yơh bruă hơduah ĕp mơnuih ngă bruă hrom, ĕp prăk kăk gơnam yua mă bruă mơ̆ng kơnuk kơna ăt kah hăng plơi pla mơnuih djuai ƀiă dŏ brơi djă pioh gru grua hiam đưm dŏ lu tơlơi tơnap tap. Tơlơi đing nao mơ̆ng djop gưl bruă, djop anom bruă amăng bruă djă pioh, răk lui, gru grua hơđăp, gru grua hiam djop djuai ania, ƀơi anŏ, ƀơi anih aka ƀu tong ten hăng aka ƀu thâo hluh djơ̆ hăng djop ôh boh yôm amăng bruă djă pioh gru grua hiam djuai ania, boh nik ñu bruă pơtôp pơblang, jak iâu mơnuih ƀôn sang ngă tui na nao re se hăng hlom bom”.

Ƀơi tơring čar Thái Nguyên, yua ngă klă bruă pơdah tơlơi adoh suang ƀơi tơring čar mơ̆ ƀing adơi đeh ană amôn djuai ania Yao plơi Suối Bốc, să Yên Ninh, tơring glông Phú Lương hlăk thâo hluh tui tơlơi yôm hrăm pơhiăp tơlơi pơhiăp djuai ania pô, hrăm adoh đưm, yut suang amăng plơi pla hăng er tơlơi adoh Pả Yung lĕ adoh kơ gru grua phun hơmâo djuai ania gơñu. Hrom hăng lu anih pơtô adoh đưm Pả Yung, sa amăng hơdôm hơdră djă pioh gru grua hiam adoh suang gah djuai ania Yao ƀơi tơring čar Thái Nguyên hơmâo djă pioh tŭ yua klă biă mă, anun lĕ akŏ pơjing khul mơnuih hor adoh suang.

Anai yơh anih djă pioh gru grua hiam mơ̆ng djuai ania Yao hrăm adoh suang gru grua djuai ania đưm, ngă pơhiam, pơđĭ tui lu bruă mă amăng tơlơi hơdip mơda, pran jua mơak mơ̆ng mơnuih ƀôn sang ƀơi plơi pla. Yă Phạm Thị Lan Anh, Khua anom gru grua tơlơi pơhing tơring glông Phú Lương, tơring čar Thái Nguyên brơi thâo:

“Kơnang kơ bruă akŏ pơjing khul adoh suang gru grua đưm amăng plơi bruă djă pioh anai ƀing gơmơi djru rŭ glăi djă pioh er tơlơi adoh, yut suang mơnuih ƀôn sang đưm, hơdôm tơlơi ngă yang mơak gah djuai ania Yao. Laih dơ̆ng ăt jing sa glông bruă pioh kơ ƀing gơmơi ăt pơtô hrăm pơlar prong tui kơ ƀing mơnuih kơhnâo kơhnăk amăng gru đưm amăng plơi pla”.

Dưi akŏ pơjing mơ̆ng sui laih, hơmâo amăng mông mă bruă ngă hmua, amăng tơlơi ngă yang rơbang h’ŭ kơ yang atâo ơi yă, tơlơi adoh Pả Yung djă pioh gru grua hiam, mơak pran jua hăng yôm biă mă amăng tơlơi hơdip mơda djuai ania Yao. Sa gru grua hiam adoh Pả Yung ñu jă đôm amăng er tơlơi adoh. Rĭm kơ tơlơi adoh er pơyiơ̆ng đok adoh tui hluai mông gêh găl, boh pia, tơlơi pơtưh hăng pơhrôp ƀô̆ mơta ñu phara soh mơ̆n. Ơi Đặng Phúc Lương, Khua hơđăp Khul anom bruă adoh suang hơ̆k hơr djop djuai ania ƀiă tơring čar Thái Nguyên brơi thâo:

“Lu er tơlơi adoh Pả Yung mơ̆ng lu khul djuai ania Yao ñu phara soh. Kơnong djuai ania Yao Quý Lâm hăng Yao Mriah đôč djơ̆ hrom. Hơdră gơñu adoh, er yŭ đĭ trun, tai ƀudah djăl, glông ber lêng kơ phara soh. Samơ̆ mơak hloh lĕ tơlơi adoh Pả Yung sa er tơlơi adoh mơ̆ng djuai ania Yao Mriah.

Amăng hơdôm thun rơgao, hơmâo tơlơi đing nao mơ̆ng anom bruă gru grua hiam, mơnuih ƀôn sang djuai ania Yao ƀơi Thái Nguyên hơmâo dơ̆ng anŏ gêh găl pôr pơthâo er tơlơi adoh đưm djuai ania pô amăng lu bruă mă, tơlơi ngui ngor jơnum amăng tơring. Er tơlơi adoh Pả Yung dưi tŭ yap jing gơnam gru grua hiam mơak pran jua gưl dêh čar. Anun lĕ, tơlơi lăp pơ-ư ang, sa arăt drah rông ba ngă pơhơdip glăi gru grua kơ djop gưl rơnuk ană tơčô djuai ania Yao, hrom hăng tơlơi thâo hluh djă pioh hăng pơđĭ tui amăng plơi pla hiam phara, amăng anun er tơlơi adoh hăng yut suang.

Ta dưi lăi, djă pioh tơlơi adoh đưm, yut suang, gông brô̆ hăng hơdră pơđĭ kyar bruă tuai čuă ngui dưi lăng kah hăng bruă mă hiam klă. Yua kơ anun yơh, lu er tơlơi adoh suang, gông brô̆ đưm dưi pioh glăi amăng rơnuk phrâo. Samơ̆ blung hlâo hloh, khom ngă tui ƀơƀrư̆ bruă čih pơkra tơlơi phiăn, jơlan hơdră tong ten hloh. Amăng anun, yôm biă mă ñu đing nao kơ bruă pơtô glăi, djru ba ƀing mơnuih kơhnâo kơhnăk gru đưm djă pioh, pơđĭ tui grugrua hiam djuai ania.

“Djru kơ ƀing mơnuih kơhnâo kơhnăk, mơnuih arăng đăo kơnang amăng plơi pla ngă pô gơgrong kah hăng ba akŏ phung tơpuôl ngă bruă djru djop khul grup hor adoh suang đưm djuai ania ƀudah ƀing thâo pơčeh phrâo pơjing rai gơnam gru grua hiam adoh suang phrâo bơwih brơi kơ mơnuih ƀôn sang djop djuai ania lir hơbit hăng bruă tuai čuă ngui laih anun pơđĭ tui hnong hơdip mơda tŭ mă anŏ mơak gru grua hiam, tơlơi adoh suang đưm djop djuai ania”.