- Ơ ơi, ih lĕ mơnuih rơgơi kơhnâo hăng abih pran jua hăng gru grua djuai ania Jarai, ih juăt hmư̆ hăng thâo lu tơlơi khan hri djuai ania Jarai mơn ?

Ơi Rmah Ban: Sit biă ñu, tơdah hmư̆ arăng adôh khan hri tui đưm hlâo adih kâo aka ƀu hmư̆ abih ôh, kâo kơnong hmư̆ pô anai pô adih khan glăi hơdôm črăn đôč. Pơhmutu anun lĕ tơlơi khan Yă Pôm, khan Drit, kha Rơmung Kuăng, khan Ơi Tŏn, khan But kông yă, khan Ƀlor, khan But tơkông yă, khan Jong be, khan Set Rok…ăt hmư̆ arăng khan glăi đôč, hmư̆ 1, 2 črăn, mơ̆ aka ƀu hmư̆ abih ôh….

- Mơng hơdôm tơlơi khan hri Jarai mơ̆ ih hmư̆, hơdôm boh tơhnal amăng tơlơi khan Jarai anun kiăng pơtă pơtăn hơget brơi ană tơčô, ơ ơi ?

Ơi Rmah Ban: Mơnuih djuai ania Jarai kah hăng djuai ania pơkŏn, mơng hơdôm tơlơi khan hri anun arăng kiăng pơtô pơblang brơi ƀing ta hơdôm tơlơi hơdip hiam klă, ƀing mơnuih ngă soh sat amra phă, kơplah wah mơnuih hăng mơnuih kiăng thâo gum djru tơdruă. Ră anai amăng plơi gơmơi ƀu hơmâo hlơi dong tah thâo adôh khan hri, ƀing tha rơma thâo mơn sang ƀu-ai buai dong tah, ƀing gơñu ƀu năm adôh khan. Ƀing thâo ƀơƀiă dŏ kơnong sa, dua čô. Ră anai ƀing ta juăt lăng tivi, hmư̆ brô̆, hơmâo djop mơta amăng plang internet yua anun ƀiă đôč mơnuih hmư̆ tơlơi adôh khan hri, mơ̆ mơnuih thâo khan ăt aset tui mơn.

-Tui pơmĭn, anom bruă bơdjơ̆ nao amra ngă hiưm pă kiăng djă pioh gru grua djuai ania Jarai lăi hrŏm, hăng tơlơi adôh khan hri hnun mơn ?

Ơi Rmah Ban: Gong phun phun jua pơhiăp dêh čar Việt Nam lêng kơ đing nao, ĕp pơƀut glăi hơdôm tơlơi adôh khan hri, kiăng rơnuk ană tơčô dưi hmư̆ hăng tŏ tui djă pioh. Đa hơmâo mơnuih rai tơña kiăng hmư̆ ƀing tha rơma adôh tơlơi khan hri mơ̆ ƀu hơmâo mơnuih adôh, ƀing gơñu lăi ƀing gơñu ƀu thâo. Năng ai ñu ƀu thâo pơanur. Ƀu djơ̆ kơnong brơi prăk arăng amra adôh brơi, tơlơi yôm hloh lĕ pran jua kiăng ĕp djă pioh, tơdah thâo pơanur amra dưi hơmâo lu kiăng djă pioh. Bruă ĕp pơƀut glăi lĕ bruă ječ ameč, khŏm mut nao tơl djop plơi pla kiăng pel ĕp, ĕp pơƀut, djă pioh, tơdah ƀing ta kaih, amra wơr mơtăm, tơdơi anai amra ƀu dưi hmư̆ dong tah.

- Ih hơmâo tơlơi rơkâo hơget mơn hăng anom bruă bơdjơ̆ nao kiăng djă pioh gru grua khan hri djuai ania Jarai pơ anăp anai ?

Ơi Rmah Ban: Tơlơi kiăng ăt lu mơn, samơ̆ aka ƀu thâo ngă hiưm pă ôh. Kâo pơmĭn ƀing ta kiăng ĕp glăi hơdôm tơlơi adôh khan hri laih anun čih glăi, mă jua adôh, in glăi amăng hơdrôm hră, ƀing ta ăt dưi čih glăi tui hăng yŭ adôh, kiăng thâo tơlơi adôh kah hăng yŭ adôh, abih bang mơnuih dưi hrăm tui hăng adôh tơlơi khan hri tui hăng jŭ adôh hơđăp.

- Hai bơni kơ ih hơmâo pioh mông bơră ruai hăng ƀing gơmơi hŏ!