Jing sa amăng hơdôm tơlơi ngă yang pơdai, ngă yang hlă gong hơdrai bơyan pơdai hroh hơmâo ngă amuñ mơn, gơnam ngă yang ƀu hơmâo hơget yom đơi lơi. Hlâo adih lơ̆m nao pơ hmua hlă gong hơdrai, pô sang hăng neh met wa amăng plơi ngă yang pơ sang. Ƀơi sang ơi Điểu Dray, ƀon Bu Prâng 1, să Quảng Trực, tơring čar Lâm Đồng, bruă prăp rơmet ngă yang hơmâo ngă yom, pơđao pran jua. Rim čô mơnuih ngă sa mơta bruă, prăp lui klă, djŏp, pơpŭ kơ yang rơbang hăng ơi yă đưm.

Ƀing đah kơmơi tơnă asơi, prăp lui gơnam ngă yang, tơkŏng tơpai. Ƀing đah rơkơi nao koh pơ-ô hiam, tơpă djuak, phun săt či ngă gong hơdrai, tơdơi kơ anun pơhrup hiam hăng bơnga pơdai, rup čim, rup hlô, hruh hni. Anai jing gru pơ ala brơi kiăng pơdai mơboh jor, hơmâo asar, puh pơđuăi hrung atâo, hlô mơnŏng glai. Ơi Điểu Dray brơi thâo: “Rim thun, lơ̆m phun pơdai glăk mơkian, ƀiă či hroh, sang anŏ djuai ania M’nông ngă yang hlă gong hơdrai. Ha hrơi hlâo kơ hrơi ngă yang, ƀing đah rơkơi nao pơ glai koh phun pơ-o, prong, hiam, tơpă či ngă gong. Ngă yang kiăng yang rơbang dŏ ƀơi gong hơdrai hăng bong brơi bơngăt pơdai dŏ hơđong ƀơi đang hmua”.

Hăng djuai ania M’nông, ngă yang hlă gong hơdrai bơyan pơdai hroh jing bruă yom biă mă, kiăng pơdai hroh hiam, hơmâo asar, mơboh jor. Ngă yăng ăt jing hrơi pơpŭ kơ lŏn adai, ngă kjăp tui tơlơi khăp ƀu-eng ană plơi pla, ngă hiam tui gru ama grua amĭ hăng pơtô ană tơčô thâo pơpŭ, thâo lăng lŏn tơnah, kyâo pơtâo. Yă Mẹ Nghiệp, dŏ ƀơi ƀon Bu Prâng 1, să Quảng Trực, brơi thâo: “Ngă yang pơdai hroh jing tơlơi pơpŭ kơ yang rơbang lăng ba ană mơnuih ta amăng hrơi blan ngă hmua pla pơjing, kiăng yang puh đuăi tơkuih prô̆, bui glai hăng hlăt mơmot eng ƀong pơdai, ăt kiăng ană bă sang anŏ hiam drơi jăn pran jua mơn”.

Lơ̆m prăp lui djŏp mơta baih, pô sang anung gơnam ngă yang hăng tơgă amăng hơkă. Rơkơi ñu djă ba gong hơdrai nao hlâo, bơnai ñu kiăo tui gui ba hơkă, neh met wa amăng plơi nao pơhmua. Truh pơ anih, pô sang ruah anih hơmâo pơdai hiam, tong krah hmua či ngă yang, giong anun hlă gong hơdrai kjăp amăng lŏn. Tơdơi kơ anun, dua rơkơi bơnai rơbat jum dar pơdai giăm gong hơdrai, hơprah drah mơnŭ, rua phun pơdai rah hiăp rah tom phun pơdai, kar hăng mơit tơlơi hiăp tơlơi čang rơmang kiăng pơdai tañ prong, tañ hroh, mơboh lu, hơmâo asar. Tơlơi ngă yang anai pơmin sit pơdai ñu hơmâo bơngăt, ñu thâo hluh pran jua mơ̆ng ană mơnuih ta.

Pô ngă yang juăt ñu lĕ pô hmua ƀudah mơnuih ană plơi juăt kơnang. Pô phai pik drah mơnŭ ƀơi gơnam yua giong anun phai, iâu yang glăi hmư̆, lăng brơi sang anŏ hơmâo pơdai lu, tơlơi hơdip trơi pơđao, yâo mơak: “Ơ yang pơdai, yang čư̆ yang ia. Hrơi anai iâu gih glăi ngui hrŏm hăng sang anŏ gơmơi, ƀong asơi ƀong mơnŭ, iâu gih lăng ba pơdai hiam, mơboh jor, huăi hơmâo hlăt, huăi hơmâo tơkuih, prô̆ ƀong pơdai. Ơ yang glăi pơ anai ƀong asơi mơñum tơpai hăng sang anŏ, hăng neh wa pơ anai hŏ,  yang čô̆”.

Tơdơi kơ hlă gong hơdrai pơ hmua, abih bang mơnuih glăi pơ sang ƀong asơi, mơñum tơpai. Tơlơi ngui ngor mơak biă, mơ̆ng sang pô anai truh pơ sang pô pơkŏn hlâo kơ bơyan pơdai hroh, kiăng hơmâo sa bơyan pơdai mơboh jor, hơmâo ƀong hơmâo huă. Anai jing hrơi mông ană plơi jê̆ giăm, tum jơngum, hok mơak jik bruă ngă hmua, čang rơmang sa bơyan hơmâo hmăi./.