Ngă yang anai, kiăng rơkâo anŏ bluh čơnăt, čăt hla, ană mơnuih mơnam suaih pral hiam drơi jăn hăng čang rơmang akŏ pơdong plơi pla ala ƀôn pơdrong asah, trơi pơđao yâo mơak.

Ngă yang iâu ia hơjan mơ̆ng djuai ania Mnông dưi pơphun lơ̆m ană plơi pla prăp lui kor hmua, pla pơjeh samơ̆ adai ăt không phang hang pơđiă, anun rơkâo kiăng hơmâo ia hơjan rơ-ơ̆ rơbŭ rơnang; sa thun ngă hmua pla pơjing duiw pĕ pơhrui rơbeh rơbai pơdai jor kơtor lu, tơlơi hơdip mơda ană plơi pla hiam mơak. Ơi Bơ̆ Khiêm, dŏ pơ ƀôn U3, să Tâm Thắng, tơring kual Êa Tling, tơring glông Čư̆ Jŭt, tơring čar Dak Nông brơi thâo:

“Ngă yang iâu ia hơjan lĕ dưi pơphun amăng blan pă bơyan phang, tơdơi kơ hơmâo hơjan lê̆ rah hơprah ƀui lŏn, blan 5 arăng pơphun tơjŭ pơdai pơdjuai tơrong pơhăng yơh, tha plơi mơnuih thâo iâu yang amra hơduah kơ yang, rơkâo khul yang čư̆, yang ia hmua pơdai ƀơi pin ia, yua pơ anai mơnuih ƀôn sang prăp lui laih djop mơta pơjeh pơdai, djuai rơtă, hơdă plui, asar tơrong pơhang, pơdai hơkuai...giong ngă yang anun, ană plơi pla nao pơ hmua yơh hrơi tơdơi tơjŭ pơdai, pơdjuai kơtor”.

Hlâo kơ ngă yang, tha plơi iâu pơthưr abih amăng plơi pla pơtum glăi pioh pơčrông sai hơdră pơphun ngă yang, tŭ ư ĕp anih pơpă, gơnam hơgĕt či ngă yang, laih anun gơnam djă ba pơkra ming ƀong mơñum hrom abih bang amăng plơi pla. Djop mơta bruă prăp lui giong laih, tha plơi pơpha bruă kơ rĭm čô mơnuih amăng plơi. Juăt ñu ngă yang pơphun amăng dua hrơi, sa hrơi prăp lui ngă yang sa hrơi hlong ngă yang. Ơi Y Sê, tha plơi ƀơi să Dak Săk, tơring glông Dak Mil, tơring čar Dak Nông lăi hlâo adih, djuai ania Mnông ƀơi Dak Nông brơi thâo.

“Anai lĕ tơlơi ngă yang prong mơ̆ng plơi pla, hlâo kơ pơphun ngă yang khom jơnum plơi pioh ĕp hrơi pơpă thơ ngă yang, hơdôm sang anŏ djru hrom, pơčruh gơnam hơgĕt, hlơi hơmâo mơnŭ djă ba mơnŭ, hlơi hơmâo braih djă ba braih, pơdai, hơmâo tơpai djă tơpai čeh pioh akŏ pơjing tơnă hơbai ƀong mơñum hrom abih bang ngă yang iâu lăi khul yang rơbang”.

Truh hrơi ngă yang pơsit laih, mơ̆ng mơguah sing bring djop sang anŏ djă ba gơnam mơnŭ, tơpai, braih...pơtum pơ sang tha plơi pioh prăp lui cic trun nao pơ pin ia ngă yang sit nik. Tui hăng tơlơi ră ruai mơ̆ng tha plơi ơi Y Sê hlâo adih, djuai ania Mnông ƀơi Dak Nông juăt ngă yang iâu ia hơjan 1 thun sa wơ̆t, ƀơi pin ia plơi pla ala ƀôn.

“Ngă yang iâu ia hơjan juăt pơphun 1 thun 1 wơ̆t, abih amăng plơi pla arăng trah rup kơbao, rơmô, un, bui, bê hăng kyâo ƀlông..hơdôm mơta rup  trah hăng kyâo ƀlông anun, pơyơr đĭ kơ yang rơbang, kiăng khul yang djru plĕ trun ia hơjan kơ plơi pla, tơlơi ngă yang anai pơphun ƀơi pin ia, tha plơi kah hăng kâo anai amra pơ ala kơ plơi pla iâu lăi djop khul yang rơbang rai ĕp lăng. Gơnam ngă yang pơyơr đĭ lĕ hơmâo mơnŭ, braih, ană bui, čeh tơpai, hơdôm boh gêt ia hăng sa ƀĕ đing djrao dưm asar pơjeh, rĭm mơta 7 asar pơjeh”.

Giong prăp rơmet abih djop mơta gơnam pioh ngă yang, tha plơi trơ̆i mă drah mơnŭ ông, lŭk amăng ia tơpai dưm amăng mơtil laih anun iâu lăi, iâu lăi rah, djă blâo mơnŭ anrŭ ia tơpai lŭk drah trah nao ƀơi rup trah hlô mơnong hăng kyâo, pik nao ƀơi čeh tơpai, ană bui hăng jum dar amăng pin ia bơmun ia....kiăng rơkâo yang rơbang djru kơ ană plơi pla dưi hơmâo ia rơbêh rơbai, ia hơjan rơnang phang mơak brơi kơ ană mơnuih mơnam hăng kiăng phun kyâo pơtâo rơ̆k tơ̆k brơi bluh tơdŭ čăt čơnuh mơda hla phrâo, đah mơ̆ng ngă pưk brơi kơtang ngă sang brơi prong bơwih ƀong huă tơjŭ pơdai jor kơtor mơboh lu, ană plơi pla trơi pơđao yâo mơak.

Lơ̆m pơphun ngă yang, ƀing nao jơngum ngui hrom khom ngă tui khut khăt tơlơi phiăn plơi pla, hơdră ngă yang khom pơpŭ lăp, ƀu dưi pơhiăp tă tăn ƀudah ngă hiư̆m pă thơ ƀu klă...djop bruă ngă tơpă hnong, hlơi ngă soh arăng đŭ, yang rơbang amra ƀu mơak kơñ tơlơi kiăng mơ̆ng mơnuih ƀôn sang ăt bơbeč yua mơ̆n.

Pơđut mông ngă yang ƀơi pin ia djop pô glăi pơ sang pioh ngă yang ha wơ̆t dơ̆ng pơđut mông iâu lăi rơkâo ia hơjan. Drah hlô mơnong pơyơr anun amra pik nao ƀơi lu anih asuek wek amăng sang, pik amăng gơnam yua mă bruă gor wăng tơgă, jông, thong dao, čing čeh....Giong anun, djop mơnuih mơñum tơpai ngui ngor hrom, atông čing, adoh suang, mơak ik ăk kơdok kơdor bă hăng pran jua gum pơgôp čang rơmang hơmâo lu tơlơi tơphă tơphai mơak hloh amăng tơlơi hơdip mơda.