VOV4.Jarai - Tui hăng tơlơi phiăn mơng djuai ania M’nông, pin ia jing anih yang rơbang dŏ wai lăng. Pin ia ăt jing anih brơi tơlơi hơdip kơ ană plơi pla mơn. yua hnun, rim thun, djuai ania M’nông juăt ngă yang pin ia pơpŭ bơni kơ yang rơbang yua hơmâo brơi hơjan klă ngă hiam brơi ană plơi, lăng ba tơlơi suaih pral kơ ană plơi. Gru grua tơlơi phiăn anai mơng djuai ania M’nông ăt kiăng pơtă pơtăn mơnuih ƀon sang thâo hluh pơgang ba ayuh hyiăng glai klô, pơgang ba ia yua.

Phrâo anai, ƀơi tơdrun ia Krông Nô, gah plơi Phú Lợi, să Quảng Phú, tơring glông Krông Nô, tơring čar Dak Nông hơmâo pơphun ngă yang pin ia mơng djuai ania M’nông. Mơng mơguah mơtăm yơh, abih bang mơnuih ƀon sang mơng plơi jê̆ plơi ataih hơdip giăm ia krông Krông Nô hơmâo nao pơƀut ƀơi pin ia laih. Gơnam ngă yang hơmâo 2 drơi mơnŭ ông, 1 drơi un tơnô, 3 čeh tơpai, 1 boh get krô sô̆ ia bă hăng sa mŏng asơi. Pô phai yang lĕ Y’Tai Jun Yuh - tha plơi plơi Phú Lợi, ñu phai tui anai: “Ană plơi gơmơi pơpŭ bơni kơ yang amăng thun blan rơgao lăng ba gơmơi hơmâo hơjan klă ngă hmua, huăi bưp ia lip, ia dăo, puh đuăi klin kheng, ngă hiam drơi jăn kơ ană plơi, pơdai mơboh jor kơtor mơboh hiam”. Tơdơi kơ phai giong, tha plơi Y Tai Jun Yuh ră ruai:

“Ngă yang pin ia či bơni kơ yang, kah hăng yang ia, yang lŏn, yang glai, yang čư̆ yang yiăng, lăng ba ană plơi pla găn rơgao tơlơi truh lŏn adai ngă, klin kheng, huăi djơ̆ djuam duam ruă, iâu yang lăng ba ană plơi hiam drơi jăn pran jua, trơi pơđao yâo mơ-ak. Ngă yang pin ia jing gru grua hiam pơpŭ kơ yang rơbang, ơi yă hơmâo brơi kơ ană plơi pla găn rơgao tơlơi truh hơjan angin, klin kheng, djơ̆ djuam duam ruă laih anun rơkâo kiăng hơmâo hơjan klă ngă hiam”.

Kiăng pơphun ngă yang pin ia, tha plơi iâu jơnum ană plơi ƀơ̆i, hơmâo abih bang pô pơ ala brơi djŏp sang anŏ amăng plơi nao jơnum či ruah mă hrơi hiam. Tơdơi kơ anun, tha plơi jao bruă kơ rim ƀut či prăp rơmet. Amăng anun, grup hlăk ai tơdăm dra hơmâo pran jua lĕ nao kih rơmet pin ia. Ƀing tha lĕ nao pơ glai koh phun pơ-o, mă hrĕ huai, mă hlang, kram, hla kyâo či pơdong gong hơdrai, pơdong sang rung, laih anun mơñam rup čim brim, hlô mơnong či pơyơr kơ yang. Tơdơi kơ pin ia hơmâo rơmet agaih baih, gơnam ngă yang hơmâo prăp lui giong mơn, ƀing đah rơkơi rơgơi mơbruă amăng plơi pơdong đĭ gong hơdrai ƀơi kơdư hơdjă, ƀơi anăp sang rung pơkra mă jăng jai, laih anun lăi pơthâo kơ abih bang thâo ƀiă truh hrơi ngă yang laih, mơnuih ƀon sang nao jơnum hrŏm.

Y Tai Jun Yuh phai yang pin ia.

Rup pơkra mă anai či pơyơr kơ yang.

Ơi Y’Ăng Phê Blang, Khua wai lăng djŏp djuai ania mơnuih mơnam plơi Phú Lợi, să Quảng Phú, tơring glông Krông Nô ăt jing mơnuih amăng grup pơphun ngă yang pin ia mơn, ñu brơi thâo, anai jing gru grua hiam mơng djuai ania M’nông hơmâo mơng đưm hlâo laih. Rơngiao kơ pơpŭ yang rơbang lăng ba ană plơi pla, ngă yang pin ia anai ăt jing tơlơi pơtă pơtăn kơ ană plơi pla thâo pơmin wai lăng ayuh hyiăng, anih hơdip, pơgang ba ia yua. ơi Y’Ăng Phê Blang brơi thâo:

“Mơng đưm đă ră hlâo laih, rim thun ăt ngă yang pin ia soh či pơpŭ kơ yang wai lăng ba ană plơi pla, huăi djơ̆ djuam duam ruă, huăi hơmâo hơjan kơthel, yua hnun gơmơi ăt djă pioh na nao mơn gru gru hiam anai. Ngă yang pin ia jing hrơi ană plơi pơpŭ kơ yang hơmâo lăng ba ană plơi pla, djru brơi ană plơi lơ̆m hơmâo tơlơi truh sat, anun jing rim thun gơmơi hơmâo pơphun ngă yang na nao mơn đah mơng huăi rơngiă hĭ gru grua hiam mơng djuai ania gơmơi”.

Ngă yang pin ia mơng djuai ania M’nông juăt pơphun amăng 2 hrơi. Hrơi blung a, ngă yang hơduah kơ ơi yă brơi ngă yang pin ia. Gơnam ngă yang hơmâo 1 drơi mơnŭ ông, 1 čeh tơpai. Tơlơi hiam mơng tơlơi ngă yang anai lĕ iâu ơi yă glăi hăng lăi pơhmư̆ kơ ơi yă brơi ngă yang pin ia. Hrơi tơdơi lĕ hrơi sit nik ngă yang pin ia ƀơi gong hơdrai hơmâo pơdong hlâo kơ anun. Gơnam ngă yang hơmâo 2 drơi mơnŭ ông, 1 drơi un tơnô, 3 čeh tơpai, 1 boh get ia hăng sa mŏng asơi. Tơlơi ngă yang tuč rơnuč ñu lĕ bơni kơ Tha plơi. Hơmâo sa drơi mơnŭ, 1 čeh tơpai. Ƀơi anai, tha plơi ăt lăi pơthâo glăi hăng yang rơbang thâo tơlơi ngă yang pin ia giong laih. Tơdơi kơ phai yang giong lĕ arăng mơñum ƀong, ană plơi ngui ngor dok dor, adoh suang, mơñum tơpai, ƀong huă mơ-ak biă mă. Abih bang adoh suang, apăn tơngan ayun suang tui jua čêng. Tơdơi kơ 2 hrơi ngă yang, neh met wa pơwơ̆t glăi tơlơi hơdip rim hrơi, nao pơ čư̆ pơhmua laih.

Ơi Huỳnh Công Nga - Kơ-iăng khua anom bruă Gru grua - pôr pơhing, tơring glông Krông Nô, tơring čar Dak Nông brơi thâo, bruă djă pioh hăng pơtrut tui gru grua hiam mơng djŏp djuai ania hơmâo ba pơmut amăng Tơlơi pơtrun Jơnum ping gah tơring glông. Rim thun, Jơnum min mơnuih ƀon sang tơring glông brơi prăk djru kơ neh met wa pơphun ngă yang hiam. Hơdôm anom apăn bruă anai gum ngă tom, djru brơi hơdôm boh plơi pla pơphun truh kih, pioh glăi tơlơi lăp hơdor hiam.

“Bruă djă pioh gru grua hiam mơng djuai ania jing bruă hơmâo ngă na nao, khŏm kiăng ngă na nao rim thun. Bruă anai hơmâo Ping gah ba pơmut amăng tơlơi pơtrun laih. Hơmâo tơlơi črâo bruă mơng Ping gah tơring glông, Jơnum min mơnuih ƀon sang tơring glông, rim thun, Anom bruă čih pơkra bruă mă hơmâo dưm dăp mrô prăk djru kơ neh met wa pơphun glăi tơlơi ngă yang pin ia anai. Tơlơi gơñăm nao phun ñu lĕ djă pioh gru grua hiam mơng djuai ania, tal 2 lĕ ƀrô hrơi dưi laih pơgang klin, tui tơlơi rơkâo mơng ană plơi lĕ kiăng ngă yang pơpŭ kơ yang gah hlâo ia, yang čư̆, yang ia, yang wai lăng plơi pla...djru brơi ană plơi dưi găn rơgao klin kheng Covid-19”.

Neh met wa atông čêng tơdơi kơ ngă yang.

Ngă yang pin ia mơng djuai ania M’nông jing gru grua hiam mơng hlâo laih. Mơng tơlơi ngă yang anai ăt pơtă pơtăn kơ abih bang mơnuih amăng plơi thâo hluh pơgang ba ayuh hyiăng lŏn adai, pơgang ba glai klô, lŏn tơnah, ia yua, hơmâo lăng kah hăng pran hơdip mơng djuai ania M’nông.

Y Sưng Phê Ja: Čih - Siu H’Mai: Pơblang