VOV4.Jarai-Lơ 25/1, jing lơ 23/12 blan tơƀang, tui hluai tơlơi phiăn đưm djuai ania Việt Nam, jing hrơi ngă yang kơ ơi Công, ơi Táo, dua čô yang pơtâo kan, gơñu đĭ akan tih glăi pơ Adai adih, lăi pơthâo tơlơi hơmâo amăng lŏn tơnah kơ ơi Adai. Yua kơ anun, rĭm thun hrơi anai, mơnuih ƀôn sang djop anih blơi akan dŏ hơdip, ba phai glăi amăng ia, prăp lui ngă yang ba nao ơi pơtâo kan glăi pơ adai adih đĭ akan tih.

Thun anai, yua bơbeč djơ̆ klin Covid 19 anun mơnuih ƀôn sang ngă yang pŭ asơi añăm, dưm añăm mơnong ƀiă thâo pơkrem samơ̆ ăt djop mơta mơnong ngă yang hăng pran jua đăo gưt pơpŭ yôm. Mah klin kheng tơnap tap samơ̆ mơnuih ƀôn sang ăt gir run djă pioh gru grua hiam djuai ania, anun lĕ phai akan amăng ia giong ngă yang, djuai akan tih, kiăng rơkâo hơmâo sa thun rơnuk rơnua, tơphă hloh. Ba nao ơi Táo đĭ akan tih glăi pơ adai adih, čang rơmang lui hĭ abih tơlơi tơnap tap hning rơngôt pơ klôn, prăp lui pran jua hiam klă hơdjhul hloh, mơak tui, yak nao amăng sa thun phrâo hơđong rơnuk rơnua mơak klă.   

Nay Jek: Pơblang