Hăng tơlơi prap lui tong ten amăng djop tơlơi adôh suang hăng apui črang, loa mơñi prong kơtang hloh, Festival hơmâo ba glăi jơlan hơdră adôh suang mơ-ak hloh, pơpŭ tơlơi yôm hloh mơng čing hơgor kual Dap kơdư; pơpŭ ƀing kơhnâo kơhnăk lĕ mơnuih djuai ania Jarai, Bahnar, Êđê, Sêdang, Jeh Triêng, M’nông….glăk dŏ hơdip amăng 5 boh tơring čar kual Dap kơdư anun lĕ Kon Tum, Gia Lai, Dak Lak, Dak Nông hăng Lâm Đồng. Amăng Festival anai, tơring čar Gia Lai hơmâo čơkă mă hră pơpŭ anih djă pioh gru grua lŏn ia mơng Khua dêh čar hăng anih djă pioh Rộc Tưng-Gò Đá hăng tơlơi pơsit tŭ yap gơnam yôm lŏn ia hăng gơnam yua Sơ Kỳ Đá Cũ An Khê.

Amăng hơdôm tơlơi ngui “rơwang hrơi tơjuh gru grua-tuai čuă ngui tơring čar Gia Lai thun 2023”, rơbêh 1.000 čô mơnuih rơgơi kơhnâo rai mơng hơdôm boh plơi pla 5 boh tơring čar kual Dap kơdư hơmâo mut hrŏm ngui atông čing rôk jơlan glông, pơhưč tơlơi đing nao mơng abih bang mơnuih hăng tua čuă ngui. Ba jua čing hơgor mơng plơi pla truh pơ plơi prong, giăm ƀiă hăng abih bang mơnuih, anai ăt lĕ hơdră mơ̆ hơdôm boh tơring čar kual Dap kơdư anăp nao djă pioh hăng lăi pơthâo gru grua čing hơgor-Gơnam yôm gah bơngăt mơng ană mơnuih.

Hluai tui hrơi ngui ngor anai amra pơgôp ngă gêh gal kiăng pơbưp nao rai, pơtrut pran gum pơgôp, thâo hluh tơdruă, djru nao rai kơplah wah mơnuih ƀon sang djop djuai ania amăng tơring čar Gia Lai hăng djop djuai ania dŏ hơdip ƀơi hơdôm boh tơring čar kual Dap kơdư./.