Djop mơta kông ngăn gru grua hiam đưm djuai ania Chăm kah hăng pra yang, tơlơi ngui ngor ngă yang mơak pơdah thâo gru grua hiam djop plơi pla, kah hăng bruă pơkra čơlŭ mong čeh hueč hăng lŏn khur, lŏn krăi plơi pla mơñam mrai đưm djuai ania Chăm hơmâo pơkra rai lu mơta gơnam sĭ mơdrô tuai rơnguai hyu ngui blơi, djru kơ mơnuih ƀôn sang hơmâo pơhrui glăi prăk kăk.

Amai Hán Thị Kim Sương dŏ ƀơi plơi Chăm Hậu Sanh, să Phước Hữu, tơring glông Ninh Phước ƀuh hor biă mă lơ̆m tal blung a dưi nao hrăm lăi nao akŏ bruă kông ngăn gru grua hiam đưm djuai ania Chăm pioh pơđĭ kyar hơđong kjăp, dưi mut hrom amăng plơi pla pơkŏn lăi pơthâo kơ tuai thâo, yua Khul Hội đồng Anh, dêh čar Angle ngă hrom sang bruă gru grua hiam Chăm Ninh Thuận pơphun. Anih pơtô hrăm anai hơmâo 35 čô ding kơna, rai mơ̆ng plơi pơkra gơnam lŏn khur gốm Bàu Trúc, plơi mơñam mrai đưm Mỹ Nghiệp hăng lu plơi pla pơkŏn amăng tơring čar hơmâo pra yang Chăm. Amai Hán Thị Kim Sương lăi:

“Thun blan rơgao, lơ̆m dưi hrăm kơ tơlơi anai, kâo ƀuh mơak hăng tŭ yua biă mă yua ta thâo hluh rơđah bruă pơđĭ kyar čơkă tuai hyu amăng plơi pla lĕ, khom pơlar gru grua hiam djuai ania Chăm ta pô. Ƀơi plơi gơmơi hơmâo pra yang Pôrôme, yua kơ anun, kâo pô ăt djru pôr pơthâo kơ tuai hyu čuă lăng pra yang Pôrôme. Kiăng ƀing tuai hyu ĕp thâo hluh tong ten kơ hơdră ta ba hyu tuai amăng tơring čar”.

Hăng lu khul pra yang ƀudah pơsat đưm Chăm ăt dŏ djă pioh đôč, hrom hăng tơlơi ngă yang ngui ngor dưi pơphun rĭm thun laih anun djop plơi pla ngă bruă pơkra ming gru grua đưm kah hăng plơi mơñam mrai Mỹ Nghiệp, plơi pơkra gơnam hăng lŏn khur Bàu Trúc, tơdah thâo dăp hơdră mă yua tong ten tơlơi gêh găl jing anih kơ ƀing tuai hyu ngui ĕp lăng mơak biă mă, pioh kơ tơring čar Ninh Thuận pok brơi hơdră ba kông ngăn gru grua hiam đưm pioh kơ tuai ĕp lăng ba glăi boh tŭ yua, hơmâo prăk pơhrui kơ mơnuih ƀôn sang hăng djă pioh gru grua hiam djuai ania Chăm. Kơ bruă pơđĭ kyar anŏ gêh găl bruă tuai čuă ngui kiăng tŭ yua hloh, amai Phạm Thu Nga, khul Hội đồng Anh brơi thâo:

“Hrom hăng mơnuih ƀôn sang djop plơi pla gum hơbit lĕ gơmơi đăo sit mơ̆n tơring čar amra pơđĭ kyar hăng djă piho rơnoh yôm gru grua hiam đưm ăt kah hăng pok pơhai bruă mă lu mơta djă pioh rah, pơđĭ tui rơnoh yôm gru grua hiam laih anun djru kơ ană plơi pla dưi pơđĭ kyar bơwih ƀong huă kơnang kơ bruă djă pioh gru grua hiam đưm djuai ania plơi pla ta pô”.

Ră anai, anih či nao ĕp lăng kah hăng plơi pơkra gơnam hăng lŏn khur gốm Bàu Trúc, plơi mơñam Mỹ Nghiệp, pơkă rĭm hrơi hơmâo rơbêh 300 wơ̆t tuai mut tơbiă čuă ngui ĕp lăng. Kơnong pra yang Pô klong Girai, rĭm thun hơmâo pơhưč tuai nao ĕp lăng truh 120 rơbâo wơ̆t. Ƀơi plơi Bàu Trúc, hrom hăng hơdră pơkra ming gơnam mơ̆ng lŏn khur, lŏn krăi dưm ƀơi kơƀang pơdar, arăng mă lŏn khur, lŏn krăi ƀơi hang arăng ngă ăt phara mơ̆n, pơhưč ƀing tuai nao ĕp lăng hor biă mă. Sit nao pơ plơi Bàu Trúc, hăng bruă ngă pơkra gơnam lŏn khur hăng pô sang, kiăng lông ngă lăng, ƀing tuai hor biă mă blơi yua djă ngui gơnam gru đưm pơkra mơ̆ng lŏn krăi  djuai ania Chăm pơjing ƀơi plơi Bàu Trúc laih anun pôr pơthâo gơnam pơkra mơ̆ng anai pơtruh hyu djop anih amăng dêh čar. Ayong Siu Hriêng sa čô tuai mơ̆ng Gia Lai ră ruai:

“Amăng hơdôm hrơi hyu čuă ngui amăng plơi Bàu Trúc, kâo ƀuh lu mơta kông ngăn, anŏ gêh găl pioh pơđĭ kyar bruă tuai čuă ngui amăng plơi pla. Sa amăng hơdôm kông ngăn yôm mơ̆ng plơi Bàu Trúc lĕ gơnam pơkra mơ̆ng lŏn khur jing gốm. Lơ̆m gốm plơi Bàu Trúc dưi hơmâo UNESCO pơsit brơi anăn kông ngăn gru grua lŏn tơnah sa tơlơi mơak anŏ gêh găl prong kơ mơnuih ƀôn sang djuai ania Chăm Bàu Trúc, dưi pơtruh hăng lu anih anom plơi pla pơkŏn ƀudah ƀing mơnuih rơgơi kơhnâo bruă đưm ngă hrom tơlơi thâo kơhnăk adoh suang pioh pơtrut bruă čơkă tui hyu ngui amăng plơi Bàu Trúc”.

Mơ̆ng dua thun hăng anai, ƀơi plơi pơkra gơnam lŏn khur Bàu Trúc hơmâo akŏ pơjing Khul ba tuai hyu ngui amăng plơi pla, pơpha djop bruă tơlơi thâo kah hăng: grup čơkă tuai, grup tơñă asơi hơbai añăm, grup pơkra gơnam lŏn khur, grup adoh suang.....

Yua hơmâo bruă mă djop grup anun Khul čơkă tuai mut amăng plơi pla Bàu Trúc ƀu kơnong pơdah kơ tuai lăng đôč, jing sa bruă mă pôr pơthâo gơnam pơkra mơ̆ng lŏn khur djuai ania Chăm amăng dêh čar ta thâo nao. Amai Đàng Thị Ngọc Ngà, ƀut plơi lơ̆m plơi Bàu Trúc, tơring kual Phước Dân, tơring glông Ninh Phước, tơring čar Ninh Thuận brơi thâo:

“Dơ̆ng mơ̆ng hơmâo Khul čơkă tuai plơi Bàu Trúc akŏ pơjing rai, ƀing gơmơi arăng pơtô brơi hơdră čơkă tuai, ba hyu tuai laih anun bơwih brơi kơ tuai hyu ĕp lăng amăng plơi pla. Ngă hiư̆m pă kiăng tuai hor, mơak sit hyu čuă lăng, tơña hơduah kơ gru grua hiam djuai ania Chăm. Mơ̆ng anun, lăi pơthâo hăng tuai amăng dêh čar hăng dêh čar tač rơngiao thâo kơ gru grua hiam djuai ania Chăm”.

Mă yua gru grua hiam pioh pơtrut bruă tuai hyu ngui amăng plơi pla djuai ania Chăm Ninh Thuận hơmâo pơsir lu bruă mă hăng rơnoh pơhrui glăi kơ mơnuih ƀôn sang. Hrom hăng anun, ră anai Ninh Thuận hơmâo lu tuai kiăng nao ĕp lăng tơña hơduah gru grua đưm djuai ania Chăm jing sa črăn ƀu kơƀah ôh bruă tuai nao ngui pơ anun, kiăng thâo rơđah anŏ hiam rô̆, hing ang plơi pla hơmâo pra yang mơ̆ng đưm đă pơpŭ kơ amĭ, kơ yă, kơ ƀing bơnai rơnuk pơtao pơtung đưm adih, djru kơ bruă pơđĭ kyar tuai čuă ngui laih anun djă pioh kông ngăn gru grua hiam mơ̆ng đưm ăt dưi dŏ na nao amăng rơnuk anai pioh kơ ană tơčô mô yâo dĭ da gla kơñ thâo hơdor tơngia kơ ơi yă, ia rơgơi tơlơi kơhnâo đưm djuai ania.