Amăng hơdrôm hră “Phun drai amăng hrơi ngă yang ƀing asơi hle mơng djuai ania Sêdang”, ơi Y Mang hơmâo pơdah hrơi blan kơsem min abih pran, kiăo tui lăng tong ten hăng čih glăi tong ten hơdôm hrơi ngă yang gru grua yôm phara ania. Ơi Y Mang brơi thâo: mơnuih djuai ania Sêdang juăt pơdong phun drai amăng hrơi ngă yang ƀong asơi hle. Anai lĕ hrơi ngă yang gru grua, mơ̆ phun drai lĕ gơnam yôm phăn kơƀah ôh. Mơng phun drai kiăng mơnuih ƀon sang pơpŭ bơni yang rơbang, čang rơmang hơmâo tơlơi rơnuk rơnua:

“Amăng hrơi ngă yang ƀong asơi hle mơng neh met wa djuai ania Sêdang ƀơi anai lêng pơdong phun drai soh. Gah yŭ phun drai arăng yol rup kuih, yua lơm phun pơdai bluh đĭ juăt ƀuh kuih akĕ ƀong, phă pơrai, gah glông arăng yol rup čim brim, lơm pơdai hroh amra ƀuh čim brim por nao ƀong. Bơ hăng glông hloh arăng tol asuk ruk, pơ ala brơi ayuh hyiăng: angĭn, gơnăm, hơjan. Hăng tơdŭ phun dra hơmâo rup sang drông hơmâo arăng mơñam hăng kram, anai lĕ kiăng pơdah tơlơi hơdip trơi pơđao, yâo mơ-ak. Jum dar phun drai hơmâo rup ƀing mơnuih wai pơgang plơi pla, wai lăng sang drông, đang hmua; rup mơnuih puh đuăi kuih, čim brim phă pơdai kơtor. Rup rap neh met wa jum dar sang drông đing tơngia hmư̆ tha plơi bơră ruai kơtuai”.

Hơdrôm hră “Phun drai amăng hrơi ngă yang ƀong asơi hle mơng djuai ania Sêdang”, blung a hơmâo ơi Y Mang abih pran kơsem min, ĕp pơƀut glăi hăng čih hăng tơlơi Sêdang. Kiăo tui anun, ñu pơblang nao tơlơi yuăn, laih anun rơkâo ƀing gơyut gơyâo, ƀing gŏp gum djru, črâo ba kơ bruă čih, yua boh pia, dưm dăp amăng hơdrôm hră. Hăng Khul gru grua adôh suang djop djuai ania Việt Nam hơmâo tŭ yap, čih amăng hơdrôm hră.

Amăng hrơi blan kơsem min, ĕp pơƀut glăi, pơblang hơdrôm hră anai, ơi Y Mang juăt nao tơl plơi pla, bưp ƀing mơnuih rơgơi kơhnâo, ƀing tha plơi, ƀing mơnuih tha rơma thâo rơđah gru grua đưm hlâo kiăng čih pơkra glăi. Ƀu djơ̆ kơnong nao tơl hơdôm boh plơi pla amăng tơring čar Dak Lak đôč ôh mơ̆ ñu ăt nao tơl hơdôm boh plơi pla amăng tơring čar Kon Tum-anai lĕ plơi pla hơđăp, anih ơi yă đưm hlâo adih dŏ hơdip kiăng kơ ĕp glăi hơdôm hơdrôm hră yôm. Ơi A Hroh (djuai ania Sêdang ƀơi ƀuôn Kon Hring, tơring glông Čư̆ Mgar, tơring čar Dak Lak lăi nao mơnuih apăn bruă Y Mang tui anai:

“Kâo ƀuh ơi Y Mang lĕ sa čô mơnuih apăn bruă gir kơtir, abih pran jua, sit biă, ñu juăt mut amăng plơi pla kiăng kơ bưp, hiăp bih hăng ƀing tha plơi, ƀing rơgơi kơhnâo, gir čih glăi, ĕp pơƀut glăi, mă boh pơhiăp kơ gru grua hơdip, hrơi ngă yang rơbang, tơlơi akhan đưm mơng djuai ania. Hăng tơlơi gir run mơng ơi Y Mang hăng hơmâo tơlơi gum djru mơng neh met wa, gơyut gơyâo ataih giăm, kâo čang rơmang ơi Y Mang amra pơgiong hơdôm hơdrôm hră kơsem min, ĕp pơƀut glăi gru grua djuai ania pô”.

Akŏ bruă kơsem min tal 2 mơng ơi Y Mang yôm phăn biă mă, anai lĕ hơdrôm hră “Tơlơi akhan đưm djuai ania Sêdang”. Anai lĕ hră pơƀut glăi hơdôm tơlơi akhan đưm mơng djuai ania Sêdang. Ñu hơmâo ĕp pơƀut glăi, čih pơkra hăng tơlơi djuai ania Sêdang, tơdơi anun pơblang nao tơlơi yuăn hăng hơmâo khul čih boh pia adôh suang djop djuai ania Việt Nam čih amăng hơdrôm hră. Lăi nao kơ akŏ bruă gru grua anai, ơi Y Mang brơi thâo: Mơng dŏ anet ñu hor hmư̆ biă mă hơdôm tơlơi akhan đưm, hơmâo ơi yă, amĭ ama bơră ruai glăi hơdôm tơlơi akhan mơ-ak, yua anun ñu gir ĕp glăi, čih amăng hơdrôm hră.

“Yua kơ abih pran jua, pioh hrơi mông kiăng nao tơl hơdôm boh sang anŏ, plơi pla mơnuih djuai ania Sêdang, rơkâo ƀing tha rơma akhan glăi, kâo čih glăi, mă boh pơhiăp. Hơdôm tơlơi akhan đưm lĕ hơdôm tơlơi bơră ruai glăi mơng rơnuk anai truh rơnuk adih. Pơhmtu, tơlơi hơdip ană mơnuih mơng tơkeng rai truh pơ djai ba, amăng rơnuk hơpă ƀing tha rơma lêng kơ hơmâo tơlơi bơră ruai glăi soh, anai lĕ tơlơi yôm phăn biă mă. Ƀing tha rơma kiăng pơtô brơi ană tơčô, bơtơhmal ƀing mơnuih ngă soh hăng tơlơi phiăn amăng plơi pla…Mơng anun, bruă pơtô hrăm juăt pơdah tong ten amăng hơdôm tơlơi akhan đưm, juăt bơră ruai glăi ƀing mơnuih hơdip hiam, bruă ngă klă kiăng ană tơčô hrăm tui. Amăng hơdôm tơlơi akhan đưm mơng djuai ania Sêdang juăt kiăng pơtô pơhrăm glăi, yua anun kâo juăt čih glăi kiăng djă pioh brơi rơnuk tơdơi dong”.

Ră anai, dua hơdrôm hră “Phun drai amăng hrơi ngă yang ƀong asơi hle mơng djuai ania Sêdang” hăng “Tơlơi akhan đưm djuai ania Sêdang” mơng ơi Y Mang hơmâo pơdă prưng yôm phăn amăng sang pơđok hră, ƀơi hơdôm boh sang hră hơdôm tơring čar kual Dap kơdư. Ơi AChă, Khua git gai Ping gah ƀuôn Kon Hring, sa amăng ƀing mơnuih hơmâo ơi Y Mang ƀơk 2 hơdrôm dră yôm anai brơi thâo.

“Kâo lăng yôm biă mă hăng pơpŭ bơni kơ ơi Y Mang hơmâo abih pran jua ĕp pơƀut glăi amăng sui thun kah mơng hơmâo 2 hơdrôm hră yôm ania. Hăng 2 hơdrôm hră anai hơmâo in jing lu hơdrôm hră hơmâo ƀơk brơi tơl tơngan neh met wa, sit biă ñu ăt ƀơk brơi ƀing čơđai sang hră ƀơi hơdôm boh sang hră gưl I, II amăng plơi pla kiăng rơnuk ană tơčô ĕp pơđok tơlơi phiăn mơng anun tŏ tui djă pioh, lăi pơthâo phiăn juăt, gru grua mơng djuai ania brơi rơnuk ană tơčô”.

Hăng 2 hơdrôm hră “Phun drai amăng hrơi ngă yang ƀong asơi hle mơng djuai ania Sêdang” hăng “Tơlơi akhan mơng djuai ania Sêdang”, ơi Y Mang hơmâo pơgôp yôm phăn amăng bruă djă pioh hăng lăi pơthâo hơdôm gru grua yôm phara mơng djuai ania pô.