Tơlơi hơdip bơwih ƀong huă gơnang nao ngă đang hmua hăng pơpŭ lu yang yua anun rĭm wŏt pơphun ngă yang wai lăng đang hmua, mơnuih djuai ania K’ho juăt pơdong phun drai kiăng kơ jak iâu yang glăi lăng hăng ngui ngor hrŏm ană plơi pla.

Hơdôm hrơi ngă yang đang hmua juăt pơphun mơng djuai ania K’ho anun lĕ ngă yang tơjŭ pơdai, ngă yang wai lăng hmua pơdai, ƀong asơi hle lêng kơ hơmâo phun drai soh. Tha plơi K’Tiếu dŏ ƀơi plơi Duệ, să Đinh Lạc, tơring glông Di Linh, tơring čar Lâm Đồng brơi thâo kiăng pơphun hrơi ƀong asơi hle amăng plơi pla juăt prap lui mơng 15-20 hrơi kiăng pơkra phun drai:

“Kar hăng kâo pơkra phun drai hăng phun ƀlang tung, phun drai ƀơi tơdŭ juăt pơkra hăng kram ale. Bruă glêh tơnap hloh lĕ bruă krih ale, tơdah hlơi ƀu thâo krih bruă pơkra phun drai tơnap biă mă. Bruă prap lui tơdah ha hơjăn đôč amra glêh biă mă, mơ̆ hơmâo lu mơnuih amăng plơi pla kah tañ giong, yua anai lĕ bruă hrŏm amăng plơi pla, ƀing gơmơi amra hyu jak iâu lu mơnuih pioh hrơi mông hăng ĕp ƀing mơnuih juăt pơkra”.

Bruă ĕp anih nao koh kyâo ba glăi pơkra phun drai ăt hơmâo mơnuih K’ho đing nao, ơi K’Tiếu brơi thâo dong:

“Hyu ĕp phun kyâo ba glăi pơkra phun drai lĕ anih aka ƀu hơmâo hlơi mut nao, ƀu hơmâo mơnuih juă glai, anai lĕ anih agaih rơnăk. Hlâo kơ koh kyâo ba glăi ƀing gơmơi juăt čuh sa drơi mơnŭ kiăng kơ ngă yang glai, yang čư̆ brơi ƀing gơmơi koh kyâo hăng pơpŭ brơi ƀing gơmơi. Ƀing gơmơi kơwưh đĭ tui anai, rơkâo yang čư̆, yang glai brơi ƀing gơmơi koh kyâo ba glăi pơkra phun drai pioh ngă yang ƀong asơi hle, jak iâu yang rơbang ƀong huă hrŏm, glăi pơ plơi pla ngui mơ-ak hrŏm amăng hrơi ngă yang ƀong asơi hle hrŏm ană plơi pla. Tơdơi kơ mông kơwưh đĭ, ƀing gơmơi trơ̆i drah mơnŭ pik ƀơi phun kyâo amra pơkra phun drai, laih anun ƀong mơnong mơnŭ giong kah dưi koh kyâo ba glăi pơkra phun drai”.

Tơdơi kơ mông ngă yang, mơnuih arăng ruah koh kyâo lĕ mơnuih arăng đăo gơnang hloh, mơnuih hơdip hiam hloh. Lơ̆m kyâo ba glăi truh pơ sang, phun kyâo anai kiăng dưm ƀơi anih ƀiă mơnuih găn nao rai hŭi kơ hlơi thơ yak tơkai găn nao rai kyâo amra pơkra phun drai. Tui ơi K’Liệu dŏ ƀơi plơi Duệ: phun drai mơng mơnuih djuai ania K’ho lu mơta tui hluai hrơi mông pơphun ngă yang mơ̆ phun drah hơmâo pơdong glông ƀudah ber tui hluai:

“Tơlơi yôm mơng phun drai pioh ngă yang amăng hrơi ƀong asơi hle ƀudah hrơi čuh ƀong kơbao, anai lĕ hrơi ngă yang prong, tơdah hrơi ngă yang pơkŏn, anai lĕ hrơi ngă yang anet ƀu kiăng pơdong phun drai ôh, arăng ƀu brơi pơdong ôh. Samơ̆ pơdong phun drai kiăng hơmâo kơbao, tlâ̆o ƀong kơbao ngă yang, đưm hlâo adih neh met wa ngă đang hmua juăt 3, 4 thun kah pơwŏt glăi, yua đưm hlâo juăt ngă hmua tui hor, lui hĭ ƀơi anai nao ngă pơkŏn, krĕp 3 thun amra ngă yang ƀong asơi hle lơm anun amra čuh ƀong kơbao hăng pơdong phun drai. Anai lĕ phun drai anet, ƀudah prong, đa hơmâo phun drai pơdong glông mơng 7 ƀudah 8 met.

Amăng hrơi ngă yang phun drai glông mơng 7 ƀudah 8 met, neh met wa juăt ruah phun kyâo amăng glai, phun prong tơpă, hăng tơdŭ phun drai arăng juăt tôl drĭ dră lăng hiam. Tha plơi K’Tiếu brơi thâo, sa amăng hơdôm anŏ hiam hloh mơng phun drai djuai ania K’ho lĕ tol lu gơnam hăng pik ia jŭ mriah kô̆ dong. Ia jŭ pơ ala brơi lŏn, ia kô̆ pơ ala brơi rơngĭt adai hăng ia mraih pơ ala brơi apui.

“Tơdah tlâ̆o čuh ƀong kơbao kiăng hơmâo phun drai, arăng juăt iâu lĕ Gnơng, bơ tơdah iâu lĕ Ndah, phun drai anai  glông ƀiă phun drai Gnơng giăm 30 met. Yua anun yơh ƀing gơmơi lăng yôm biă mă phun drai, tơdah ƀu hơmâo phun drai, mông ngă yang ƀu yôm ôh, lơ̆m anun yang glai, yang ia krông čroh hnoh amra ƀu glăi ngui hrŏm, yua anun ƀing gơmơi pơdong phun drai anai. Phun drai pơkra giong; hlâo kơ pơdong đĭ, ƀing gơmơi kiăng trah kyâo brơi kơ hiam, tơdah ƀu tơphă gong phun drai joh ƀudah ƀu dưi pơdong, kah hăng lơm pơdong đĭ hơmâo sa, dua čô mơnuih duam ruă, amra hơmâo tơlơi truh sat hơget amăng plơi pla”. 

Ăt tui tha plơi K’Tiếu lơ̆m pơdong phun drai, mơnuih djuai anai K’ho juăt ruah bê čuh ngă yang:

“Mơnuih djuai ania K’ho juăt kơwưh tơdah ƀing gơmơi čuh tă sa drơi un lĕ kiăng ngă pơdrông asah brơi kơ ta pô, yang rơbang juăt hor bê, anai lĕ yang pơdrông asah, tơdah ƀing gơmơi tlâ̆o čuh ƀong sa drơi kơbao amra ngă pơdrông asah brơi ană plơi pla, mơng anai arăng amra hmư̆ hing amăng plơi pla anai hơmâo lu mơnuih pơdrông asah, yua anun arăng juăt ngă yang mơng sa drơi un pơ glông, un ngă yang amăng sang anŏ, bê ƀudah kơbao arăng amra akă ƀơi phun drai”.

Tui tơlơi phiăn phun drai lĕ anih mơnuih djuai ania K’ho rơkâo yang rơbang glăi lăng hăng ngui ngor hrŏm ană plơi pla.