Anai lĕ sa amăng hơdôm bruă mă anăp nao tal hơdor glăi 50 thun hrơi akŏ pơjing tơlơi rô nao rai pơtom hiăp Việt Nam-Japan (21/9/1973-21/9/2023). Amăng jơlan hơdră, hơmâo ƀing khua mua hăng ƀing tuai nao lăng mông ngui adôh suang mơ-ak. Hăng hơdôm tơlơi adôh tơlơi adôh laih dong pĕ gông brô̆ mơng djop djuai ania ƀơi kual Dap kơdư hăng mơng dêh čar Japan, hơmâo hơdôm tơlơi adôh pơpŭ bơni anŏ hiam mơng plơi pla lŏn ia, ană mơnuih ƀơi rĭm boh dêh čar tui hăng ƀing adôh suang mơ-ak hloh. Ƀing khua mua ăt mut hrŏm lăi glăi tơlơi tơña bơdjơ̆ nao gru grua 2 boh dêh čar Việt Nam-Japan; nao lăng anih pơdă prưng hơdôm gơnam tui OCOP mơng hơdôm anom bơwih ƀong sĭ mơdrô gah Khul đah kơmơi bơwih ƀong sĭ mơdrô amăng plơi prong Buôn Ma Thuột hăng nao ƀong huă hrŏm hăng hơdôm gơnam ƀong yua mơnuih Japan tơnă hơbai.

Ơi Võ Tấn Tài, Kơ-iăng khua khul giang mah Việt Nam-Japan tơring čar Dak Lak brơi thâo, anai lĕ tơlơi pơđŏm glăi yôm phăn tơlơi rô nao rai kơplah wah dua boh dêh čar hơmâo hrưn đĭ jing tơlơi rô nao rai jai dơlăm tui. Bruă pơbưp nao rai kiăng pơtô pơblang, lăi pơthâo rup rap lŏn ia, ană mơnuih kơplah wah 2 boh dêh čar; djru brơi tơring čar pơđĭ kyar tui anŏ gal, pok ngă hrŏm, pơgôp pơtrut mut hrŏm gru grua mơng ƀon lan jai dơlăm hăng hơđong kjăp.