Pơphun pơdă na nao lui mơ̆ng truh abih lơ 31/12/2024, Hơdră anai kiăng lăi pơthâo, râo pơƀuh kơ ƀing tuai nao ĕp lăng hơdôm rơbâo mơta gơnam yua mă bruă mơ̆ng đưm đă djop djuai ania kual Dap Kơdư yua kơ pô djă pioh hơduah ĕp gơnam đưm Đặng Minh Tâm pô pơdă hăng lăi pơthâo. Hơdôm mơta gơnam đưm ba pơdă, brơi ĕp lăng pơpha 6 khul kah hăng : Gơnam mă yua adoh suang jing gông brô̆, gơnam yua hyu đŏm bua lua pơnah hlô glai, hyu duñ pĕ boh troh amăng glai, gơnam yua pioh mơñam mrai, gơnam yua ngă yang rơbang, gơnam yua pơhrôp hiam drơi jăn hăng lu mơta gơnam yua amăng tơlơi hơdip mơda dŏ dong ƀong huă rim hrơi mơ̆ng mơnuih ƀôn sang djuai ƀiă kual Dap Kơdư.

Gơnam ba pơdă kah hăng sang pơdă gơnam đưm brơi pok bah amăng na nao, pioh kơ tuai mut ĕp lăng, kơsem min, čih pioh, thâo krăn djop mơta gơnam yua đưm đă. Ăt amăng hrơi blan pơdă gơnam anai mơ̆n, amra pơhrua nao dơ̆ng rơbêh 30 rơbâo mơta gơnam đưm đă amăng kual Dap Kơdư yua kơ mơnuih kơsem min djă pioh gơnam gru đưm Đặng Minh Tâm pô pơphun.