Lơ 19/7, ƀơi plơi prong Buôn Ma Thuột, Khua anih jưh pơ ala kơ dêh čar Hà Lan gum hrom hăng Sang djă pioh gru grua kơ phê pơphun pok phun pơdă prưng Pran gơgrong – Hơdôm tơlơi ruai kơ đah kơmơi ngă pơhưč kơ tơlơi pơplih. Anai lĕ bruă mă amăng rơwang hơdor glăi 50 thun tơlơi pơtôm hiăp kơplah wah Hà Lan hăng Việt Nam.

Pơphun mơng ră anai truh abih lơ 19/8, Bruă pơdă prưng hmâo pơdă prưng laih rŭp mơng 17 čô mơnuih čơphin rup ƀơi 13 bôh dêh čar, hăng bôh yôm lĕ hơdôm tơlơi ruai ba truh tơhnal lăng dơlăm kơ gru rup đah kơmơi hmâo yak rơgao tơlơi lông, tơlơi tơnap. Hơdôm rŭp hmâo mă pri amăng bruă pơdă prưng dưi pơphun ƀơi Hà Lan amăng thun 2021, ngă rŭ đĭ kơtang pran ngă pơhưč hăng lu mơnuih ƀơi dêh čar hmâo lu bơnga Tulip, pơdah tơlơi pơpŭ hơdôm tơlơi gum hơgôp mơng đah kơmơi hăng pơdah pran jua pơpŭ hăng tơlơi gơgrong mơng gơñu.

Amăng rơwang pơdă prưng ăt pơdah mơn mông bơkơtuai hăng tuai jak iâo Dra hiam Việt Nam H’ Hen Niê hăng sa dua čô đah kơmơi bơwih ƀong sĭ mơdrô truh kih amăng lu bruă. Gơñu lăi pơthâo laih hơdôm tơlơi ruai kơ drơi pô bă kơ tơlơi ngă pơhưč kơ pran gơgrong yak rơgao tơnap, tơlơi lông pioh hmâo hơdôm truh kih hăng bruă apăn hơđong amăng mơnuih mơnam./.