VOV4.Jarai - Tal pơplông bơrơguăt drơi jăn kual Đông Nam Á SEA Games 31 amra pơphun hrơi pơđut hĭ ƀơi Cung điền kinh tơdron pơplông bơrơguăt drơi jăn Mỹ Đình, Hà Nội amăng mơmŏt (23/5) tơdơi kơ 12 hrơi pơplông sit nik. Hăng anăn “Tum pơƀut kiăng pơdah pran kơtang - Gather ton shine”, jơlan hơdră pơđut hĭ SEA Games 31 hơmâo 3 črăn.

Akŏ phun lĕ mông pơđut hĭ hơmâo 2 jơlan hơdră “Tum pơƀut”, hăng mông dui đĭ hla kơ, hơdôm tơlơi ngui hrŏm mơng 11 boh dêh čar, 40 tơlơi pơplông bơrơguăt drơi jăn, ƀing wai lăng hăng ƀing djru bruă. Hrŏm hăng anun lĕ rup rap hiam hloh amăng 12 hrơi pơplông SEA Games 31.

Tơlơi yôm hloh amăng jơlan hơdră anai lĕ mông pơjrao nao rai hla kơ kơplah wah Khul pơlir hơbit bơrơguăt drơi jăn kual Đông Nam Á hăng Việt Nam brơi ƀing pơ ala mơng Jơnum min Olympic dêh čar Kur - lĕ dêh čar pơphun SEA Games 32. Tal pơplông pơphun 40 tơlơi bơrơguăt drơi jăn hăng 526 boh tơhnal, mơng 11 grup pơplông amăng kual Đông Nam Á, hăng abih tih giăm 10.000 čô mơnuih nao pơplông, ƀing nai pơtô, ƀing apăn bruă, ƀing wai lăng.

Boh than tuč rơnuč, tui hăng mrô miđai dưi mă mơng djop grup, dêh čar Việt Nam dong tal 1 hăng 205 asar miđai ia mah, kiăo tui tlôn lĕ Thái Lan 92 asar miđai ia mah, dong tal tlâo lĕ Indonesia hăng 69 asar miđai ia mah.

Siu Đoan: Pơblang