VOV4.Jarai - Tơdơi kơ 2 wơ̆t hrơi tơjuh pơphun jơnum, mơmot lơ 30/6, ƀơi plơi prong Buôn Ma Thuột, Dak Lăk, Jơnum ngui adoh suang đơ đam dêh čar tal 2, thun 2021 pơđut laih. Pơphun mơng lơ 17/6 truh lơ 30/6, Jơnum tal anai hơmâo 22 anom bruă gum ngă, hăng giăm 300 tơlơi adoh suang, hơmâo rơbêh 1.000 čô mơnuih adoh, mơnuih ngă sen hăng khua mua, mơnuih mă bruă mơng hơdôm khul grup adoh suang.

Anom pơphun pơplông brơi pri kơ hơjăn pô hăng khul grup hơmâo tơlơi adoh suang mơ-ak hloh.

Tui hăng tơlơi pơsit mơng anom pơphun, jơnum ngui tal anai hơmâo lu tơlơi adoh suang djơ̆ hơnong pơkă, ngă pơhưč mơnuih nao lăng. Lu tơlơi adoh suang hơmâo tŭ yua, hơmâo akŏ bruă, hơmâo pơƀuh ƀơi anih adoh suang klă biă. Rơngiao kơ hơdôm tơlơi adoh suang kiăo tui gru grua plơi pla ăt hơmâo mơn tơlơi adoh suang mă yua tơlơi pơhiăp rơnuk phrâo, pơčeh rai phara huăi kiăo tui gru arăng ôh, pơjing rai tơlơi adoh suang Việt Nam hơmâo gru grua phara hloh.

Siu H’Mai: Pơblang