VOV4.Jarai - Tơdơi kơ 4 hrơi pơphun lu bruă mă, ƀơi Kual tuai čuă ngui anih anom prong Măng Đen, tơring kual Măng Đen, tơring glông Kon Plŏng, tơring čar Kon Tum hơmâo pơphun jơnum pơđut gru grua adoh suang djŏp djuai ania ƀiă kual Trường Sơn - Tây Nguyên pok prong tal 3 thun 2022. Ƀơi mông jơnum ngui hơmâo năng ai 100 tơlơi adoh akhan hơmâo ba pơƀuh, 19 ƀlah eng ao, 19 boh jam dưm gơnam ƀong huă tui gru đưm...hăng tơlơi rơgơi mơng ƀing rơgơi kơhnâo, abih pran jua ngă bruă, pơƀuh gru grua, dưm dăp pơčeh phrâo.

Anih ngui ngor mlăm pơđut tơlơi jơnum.

Ơi Nguyễn Công Trung, Kơ-iăng khua Anom bruă gru grua plơi pla - Ding jum gru grua, bơkơjăp drơi jăn hăng tuai čuă ngui, brơi thâo hrŏm hăng tơlơi dưi ngă hrŏm, jơnum ngui tal anai yôm biă mă amăng bruă djă pioh, pơtrut tui gru grua boh thâo. Amăng hrơi jơnum pơđut, Anom bruă jơnum ngui hơmâo brơi hră bơni, hla kơ gru dêh čar kơ 19 grup hơmâo lu tơlơi gum pơgôp amăng hrơi Jơnum ngui hăng lu pri apah bơni pơkŏn dong.

Siu H’Mai: Pơblang