Jơlan rơdêh treng Đà Lạt-Trại Mát glông 6,7 km, anai lĕ ară jơlan dŏ glăi mơng Tháp Chàm-Đà Lạt, glông 84 km, tô nao rai tơring čar Ninh Thuận hăng Lâm Đồng pok mơng thun 1932, yua dêh čar Prang man pơkra. Anai lĕ jơlan rơdêh treng đuăi hăng tơgơi pơdơi ƀơi dêh čar Việt Nam kiăng pơgiăng hyu tuai čuă ngui ƀơi plơi prong Đà Lạt.

Rơdêh treng đuăi mơmŏt mlăm mơng Đà Lạt-Trại Mát hăng anăn “Jơlan rơdêh treng mlăm Đà Lạt”, rơdêh treng amra đuăi rơnang, abih tih mông đuăi nao rai lĕ 1 mông, hơmâo kông ti rơdêh treng Việt Nam pok pơgiăng hyu tuai mơng 6 mông 15 mơnit tlam truh 9 mông 20 mơnit mơmŏt rĭm hrơi. Đĭ rơdêh treng mơmŏt mlăm anai, rơngiao kơ bruă dưi lăng hyu anŏ hiam amăng mơmŏt mơng Đà Lạt, tuai čuă ngui ăt dưi hmư̆ adôh suang, ƀong huă hrŏm tui tơlơi rơkâo.