Pơphun amăng 2 hrơi, lơ 14 hăng lơ 15/4, hrơi jơnum hmâo tơlơi gum hrom mơng giăm truh 800 čô mơnuih thâo tơlơi đưm, mơnuih apăn bruă, mơnuih mă bruă, djop djuai ania ƀơi 17 bôh tơring glông, plơi prong mơng tơring čar. Nao jơnum hrom, hơdôm grŭp mơnuih thâo tơlơi đưm hăng ƀing thâo tơlơi đưm amra pơdah glăi tơlơi hơdip mơda plơi pla hluai tui hơdôm bruă mă: Pơdah atông čing hơgor, adôh tơlơi adôh đưm, suang đưm, pơdah pĕ gông atông brô̆, pơdah trah rŭp, añăm bung bai, mơñam mrai...

Hrơi Jơnum ngui bôh thâo djop djuai ania tơring čar Gia Lai lĕ tal pioh neh wa djop djuai ania lu rơnuk ƀơi tơring čar pơbưp nao rai, bơkơtuai, lăi pơthâo tơlơi găn rơgao hăng hruă kơjăp pran jua gum hrom hơbit. Tơdơi kơ ngă lơphet pok phun lĕ črăn pơdah atông čing hơgor mơng hơdôm grŭp thâo atông čing hơgor. Lu tuai čuă ngui hmâo gum hrom laih amăng tơlơi jơnum ngui hăng yun suang ƀơi Dăp Kơdư./.