VOV4.Jarai - Mơmot lơ 19/4, Hrơi Jơnum ngui bôh thâo djop djuai ania ƀiă tơring čar Gialai tal Sa thun 2022, hmâo pok phun ƀơi tơdrŏn lak Đại Đoàn Kết, plơi prong Pleiku. Pơphun amăng dua hrơi, mơng 19 truh kơ 20/4, hrơi Jơnum ngui bôh thâo djop djuai ania ƀiă tơring čar Gialai tal Sa thun 2022 hmâo tơlơi gum hrom mơng giăm truh 800 čô mơnuih thâo bôh thâo đưm, mơnuih apăn bruă, mơnuih mă bruă čar, djop djuai ania ƀơi abih bang 16 bôh tơring glông, plơi prong amăng tơring čar.

Hrơi jơnum ngui lĕ sa amăng hơdôm bruă mă djru pơgang, ngă tui anô̆ yôm phăn mơng bôh thâo phiăn juăt mơng neh wa djop djuai ania ƀiă tơring čar Gialai; čơkă mơ-ak hrơi Bôh thâo djop djuai ania Việt Nam (19/4); hơdor glăi 47 thun hrơi Tlaih rơngai kual Dơnung dêh čar, pơlir hơbit lŏn ia hăng 90 thun hrơi Pơdŏng tơring čar Gialai. Hrơi Jơnum ngui bôh thâo djop djuai ania ƀiă tơring čar Gialai ăt lĕ tal pioh neh wa djop djuai ania ƀiă amăng tơring čar pơbưp, bơkơtuai, lăi pơthâo tơlơi găn rơgao hăng ngă kơjăp pran jua gum hrom hơbit./.

Siu H’ Prăk: Pơblang