VOV4.Jarai - Mơmot lơ 29/3, ƀơi să Ka Đơn, tơring glông Đơn Dương (Lâm Đồng) hmâo pơphun ngă Lơphet pok phun Hrơi jơnum ngui bôh thâo, bơkơjăp drơi jăn kual djuai ania ƀiă tơring čar Lâm Đồng tal V – 2022.

Phiăn juăt hrơi jơnum ngui ƀơi hơdôm jơlan amăng plơi prong, plơi pla

Hăng anăn ñu “Âm Vàng Cao Nguyên”, Hrơi jơnum ngui bôh thâo, bơkơjăp drơi jăn kual djuai ania ƀiă tơring čar Lâm Đồng tal V – 2022 ngă pơhư̆č 300 čô mơnuih mơng 12 bôh tơring glông, plơi prong amăng tơring čar Gum hrom. Amăng 2 hrơi, hrơi jơnum ngui pơphun bruă kiăng lăi pơhing kơ pơgang, ngă tui gru grua bôh thâo đưm čing hơgor Dăp Kơdư; pơplông ngă tui truh kih Tơlơi pơtrun pơsit Jơnum khua pơ ala đơ đam dêh čar tal 13 mơng Ping gah.

Hơdôm khul mơnuih thâo phiăn juăt đưm gum hrom pơdă prưng băn ao mơñam mơng djuai ania

Biă ñu, ngă Lơphet pok phun hăng Mlăm jơnum ngui gum hrom hơbit “Âm Vang Cao Nguyên”, lu tơlơi pơdah ƀơi anih adôh suang, pơdah glăi gru đưm ba yang apui, yang čing, ngă yang bơnư̆ ia mơng djuai ania Chru; bơkơtuai nao rai tơlơi tơnă hơbai hăng atông čing hơgor, adôh suang, jơnum ngui plơi pla mơng ƀing thâo phiăn đưm djuai ania Mạ, K’ho... Rơngiao kơ anun, hrơi jơnum dô̆ pơdah hơdôm tơlơi pơplông kơ bơkơjăp drơi jăn, hơdôm tơlơi ngui ngor đưm, jơnum ngui atông čing hơgor hăng adôh tơlơi adôh đưm..../.

Siu H’ Prăk: Pơblang