VOV4.Jarai - Čơtlăm lơ 18/9, ƀơi tơdrŏn đă bôh lông Pleiku pok phun ngă lơphet Jơnum bơkơjăp drơi jăn tơring čar Gialai tal 9 thun 2022. Bruă jơnum ngui bơkơjăp drơi jăn tơring čar Gialai tal anai hmâo tơlơi gum hrom mơng 20 grŭp mơng 17 bôh tơring glông, plơi prong hăng 3 gơnong bruă: Kông ang, pơtô pơhrăm, Khul ling tơhan hăng rơbêh kơ 1.800 čô mơnuih pơplông.

Hơdôm mơnuih pơplông pơphun pơplông mă 197 bôh miđai hăng 19 mơta tơlơi pơplông: Đă bôh lông, pah bôh lông, dui hrĕ, luai ia, pơnah hrăo, tŭn gai, pah blâo mơnŭ, karate, tawondo, vovinam.... Bơhmu hăng Jơnum ngui bơkơjăp drơi jăn đơ đam tơring čar tal 9, tal jơnum anai hmâo dong tơlơi pơplông luai ia. Hlâo kơ jơnum pok phun, mơng lơ 9/8, Jơnum ngui bơkơjăp drơi jăn tơring čar tal 9, hmâo pơphun lu bôh yôm pơplông. Yap truh čơtlăm lơ 18/9, mơnuih pơplông mơng plơi prong Pleiku glăk ba jơlan hlâo jăng jai, tơring glông Ia Grai tal dua hăng 24 bôh miđai ia mah, tơring glông Đức Cơ jăng jai dăp tal 3. Jơnum ngui amra pơđut amăng lơ 23/9./.

Siu H’ Prăk: Pơblang