Pơphun mơng ră anai truh abih blan 4 pơ̆ anăp, akô̆ bruă “Băn ao đưm djop djuai ania ƀơi Daklak” hmâo 175 mơta gơnam hăng gru rŭp, băn ao mơng 48 djuai ania glăk dô̆ hơdip mơda ƀơi Daklak. Hơdôm mơta gơnam dưi pơdă prưng jing 8 anăn bơdjơ̆ nao hrom hăng 8 djuai bôh pơhiăp, lăi pơthâo gru bôh thâo đưm, tơlơi hơdip mơda mơng djop djuai ania hluai tui hơdôm băn ao đưm, gơnam pơhrôp hăng gơnam mă yua rim hrơi mơng gơñu.

Hrom hăng anun, amăng rơwang pơdă prưng dô̆ hmâo hơdôm bruă găn rơgao lăng kah hăng: rơngaih mơñam băn ao, lăi pơthâo sa dua mơta gơnam mơng Daklak, ngă tui hăng ƀong mơñum lăng gơnam ƀong mơñum đưm gah djuai ania Êđê. Tal anai, Sang djă pioh gru grua Daklak ăt lăi pơthâo bruă mă pơplih mrô dưi pok pơhai ƀơi anom kah hăng: lăi pơthâo hăng ba yua măi mok pioh kơ tuai čuă lăng gơnam pơdă prưng; pơtô brơi tuai mă yua App gum hrom ƀơi hơdôm măi mok điện tử; lăi pơthâo nao rai hăng gơnam tam hăng hơdră phrâo 3D; găn rơgao lăng hơdôm bruă mă hăng măi mok sit nik pơdah rŭp./.