VOV4.Jarai - Čơtlăm lơ 1/7, ƀơi tơdrŏn đă bôh lông tơring čar Kontum pơphun ngă Lơphet pok phun Pri pơplông đuăi plông dlông ataih hơdôm hnưr hlăk ai lŏn ia thun 2022. Pri yua kơ Khul pơlir hơbit pơplông đuăi plông dlông ataih Việt Nam gum hrom hăng tơring čar Kontum pơphun.

Pơphun amăng 5 hrơi, mơng lơ 1 truh lơ 5/7 ƀơi tơdron đă bôh lông tơring čar Kontum, Pri pơplông đuăi plông dlông ataih hơdôm hnưr hlăk ai lŏn ia thun 2022 hmâo 670 čô mơnuih pơplông mơng 61 bôh tơring čar, ƀôn prong hăng gơnong bruă amăng đơ đam dêh čar ta gum nao pơplông. Ƀing nao pơplông hmâo hnưr thun mơng 12 -17 thun gum hrom pơplông 136 mơta tơlơi pơplông 136 per miđai. Hluai tui Pri kiăng thâo, ruah mă hăng pơhrăm brơi hơdôm mơnuih pơplông hlăk ai hmâo tơlơi pơđĭ pran pơhrua nao khul mơnuih kơ hơdôm tal pơplông lŏn ia hăng jar kơmar./.  

Siu H’ Prăk: Pơblang