Anai lĕ thun tal 5 bruă pơplông kơ phê jơman Việt Nam dưi pơphun. Nao pơplông kơ phê jơman Việt Nam thun anai hmâo 47 bôh anom mơng 7 bôh tơring čar hăng 84 mơta djuai kơ phê ruah pơplông, abih bang mrô kơ phê 157 tơn. Amăng rơwang pơplông hrom rơnuč, Grŭp čom puang hmâo ruah laih 46 gru kơ phê pơsit dăp tal sa, tal dua, tal tlâo ăt kah hăng ruah tơbiă top 10 mơta kơ phê pơkra jơman thun 2023.

Ơi Trịnh Đức Minh, Khua Khul kơ phê Buôn Ma Thuột, Khua Grŭp pơphun bruă pơplông brơi thâo: rơwang pơplông hrom rơnuč pơphun mơng lơ 25-28/4/2023. Hrom hăng hơdôm bôh yôm pơplông dô̆ hmâo sa dua bruă pơdă prưng, pơkra kơ phê mơñum jơman; pơdă prưng gơnam mă yua, măi mok, hơdrôm hră, pơjeh kơ phê; pơdah pơkra kơ phê; tơlơi ngui hmâo apah pri. Biă ñu, tơdơi kơ pơplông grŭp pơphun bruă pơplông amra juă nua mrô kơ phê jơman pơkra jơman hloh kiăng djơ̆ tui tơlơi kiăng sĭ blơi hăng đĭ nua kơ phê jơman mơng Việt Nam./.