VOV4.Jarai - Ƀrô tal hơdor glăi 132 thun hrơi tơkeng Khua mir sir Hồ Chí Minh hăng hơdor glăi 35 thun hrơi Khul pơtô pơhrăm, kơsem min boh thâo hăng gru grua mơng Sang gum hơbit djop dêh čar (UNESCO) pơpŭ kơ Khua mir sir Hồ Chí Minh lĕ “Mơnuih sông kơtang djru pơklaih rơngai lŏn ia”, “Mơnuih gru grua hiam klă”, ƀơi tơdron đă boh lông Làng Sen, să Kim Liên, tơring glông Nam Đàn, Jơnum min mơnuih ƀon sang tơring čar Nghệ An gum hrŏm hăng Ding jum gru grua, bơrơguăt drơi jăn hăng tuai čuă ngui pơphun Ngui Làng Sen hăng ngui adôh Tuồng hăng tơlơi akhan hri đơ đam dêh čar thun 2022.

Ƀing pơ ala brơi  djop ding jum, gơnong bruă, anom bruă, Khua mua tơring čar Nghệ An hăng giăm 1.000 čô mơnuih adôh suang, mơnuih bơrơguăt drơi jăn, hlăk ai čơđai hăng abih bang mơnuih ƀon sang nao jơnum hrŏm. Amăng mông pơphun ngui Làng Sen, ƀing khua mua, mơnuih ƀon sang amăng tơring čar hăng tuai čuă ngui hơmâo lăng jơlan hơdră adôh suang hăng anăn “Ñu lĕ anih đăo gơnang ba glăi tơlơi truh kih” hrŏm hăng hơdôm mông adôh hơdôm tơlơi adôh pơpŭ kơ Wa Hô, pơpŭ kơ Ping gah hăng pran khăp kơ lŏn ia ta.

Siu Đoan: Pơblang