VOV4.Jarai - Mơmŏt lơ 11/1, ƀơi plơi prong Buôn Ma Thuột, anom bruă bơrơguăt drơi jăn, Khul peng pong Việt Nam gum hrŏm hăng Jơnum min mơnuih ƀon sang tơring čar Dak Lak pơphun tal pơplông hơdôm grup peng pong dêh čar thun 2021. Tal pơplông anai pơphun dong mơng mơmŏt lơ 11/1/2022 truh abih lơ 15/1/2022. Tal pơplông thun anai pơƀut glăi 152 čô mơnuih nao pơplông mơng 22 grup peng pong mơng 10 boh tơring čar, plơi prong hơmâo grup peng pong kơtang hloh anun lĕ: Hà Nội, ƀôn prong Hồ Chí Minh, Đà Nẵng, hơdôm tơring čar Hải Dương, Hải Phòng, Khánh Hòa, Lâm Đồng, Nghệ An, Bình Dương hăng Daklak.

Ƀing mơnuih nao pơplông amra bơkơtưn mă 14 mơđai lơ̆m pơplông: grup dua čô đah rơkơi, grup dua čô đah kơmơi, grup đah rơkơi hăng đah kơmơi, đah rơkơi hăng đah rơkơi, đah kơmơi hăng đah kơmơi. Tui hăng grup pơphun, anai lĕ tal pơplông amăng hơdôm gru pơplông peng pong dêh čar, mơng tal pơplông anai, Khul peng pong Việt Nam amra ruah ƀing mơnuih rơgơi hloh kiăng kơ pơtô brơi dong laih anun ba mut amăng grup pơplông peng pong dêh čar ta.

Siu Đoan: Pơblang