Glăk amăng bơyan yuă pơdai, samơ̆ rim mơmot, Pleiku Roh, phường Yên Đỗ, plơi prong Pleiku ăt đik đak jua čing, abih bang ră ruai pơhiăp tlao hao hač ƀơi sang rung. Yua dah anai jing hrơi giăm 50 čô hlăk ai čơđai anet hăng ƀing tha amăng plơi atông čing, pơtô hrăm hơdôm tơlơi atông ba atông amăng hrơi Festival Gru grua Atông čing Gia Lai thun 2023 pơphun amăng lơ 11 hăng 12/11. Ayong Siu Thưm - grup atông čing hlăk ai brơi thâo, grup kơhnăk mơ̆ng plơi amra pơƀuh 4 mơta tơlơi atông anun lĕ ngă yang huă asơi hle, adoh tơlơi adoh đưm, atông čing hăng atông hrŏm lu djuai gong brô̆.

“Truh bơyan yuă pơdai laih, samơ̆ ƀing kơhnăk ăt pơtŏp atông čing, pơtŏp suang kiăng ba pơƀuh tơlơi atông mơ-ak hloh, kơdrưh hloh, bơwih brơi kơ ƀing tuai”.

Ƀơi tơring glông Krông Pa, bruă prăp rơmet ăt hnun mơn. Ơi Ngô Đức Mạo - Khua anom bruă gru grua - bơkơjăp drơi jăn hăng tuai čuă ngui tơring glông brơi thâo: thun anai, tơring glông pơkiăo nao 50 čô kơhnăk nao jơnum ngui amăng Rơwang hrơi tơjuh gru grua mơ̆ng tơring čar. Tui anun, hơdôm tơlơi atông čing amra hơmâo atông amăng Festival; ƀing kơhnâo kơhnăk hơmâo pơƀuh glăi lu bruă đưm kah hăng mơñam rơ-i, trah rup, mơñam mrai amăng hrơi jơnum ngui ƀơi jơlan. Kiăng pơjing rai gru grua hiam mơ̆ng djuai ania ƀiă, grup pơkra añăm ƀong huă hmư̆ hing kah hăng asơi brŏm mơnŭ ŏm, mơnŏng rơmô krô kiăng abih bang tuai thâo:

“Lơ̆m mơmot, tơdơi kơ mă bruă giong, ƀing kơhnâo kơhnăk pơƀut pơ sang gru grua plơi pla či pơtŏp. Hăng ƀing kơhnâo trah rup, mơñam mrai, mơñam rơ-i čơngua, tul čing lĕ ăt prăp rơmet nao pơ Pleiku či pơkra giong gơnam, pơƀuh kơ ƀing tuai. Rim mơmot yơh ƀing kơhnăk pơtŏp bruă atông čing ngă yang kah hăng huă asơi hle, pơtrum kơbao ba glăi anih ngui ngor gru grua phara mơ̆ng djuai ania Jarai či Krông Pa”.

Rơwang hrơi tơjuh Gru grua tuai čuă ngui Gia Lai thun 2023 amra pơphun mơ̆ng lơ 11 truh lơ 18/11 hơmâo năng ai 1.000 čô kơhnăk amăng hăng gah rơngiao tơring čar. Rơwang hrơi tơjuh gru grua amra pơphun hăng hrơi ngui ngor Festival Atông čing Gia Lai thun 2023 hơmâo ƀing rơgơi atông čing mơ̆ng 17 boh tơring glông, plơi prong amăng tơring čar hăng hơdôm boh tơring kual Dap Kơdư. Tŏ tui lĕ jơnum ngui bơnga ang - čư̆ apui kơdir Čư̆ Đang Ya (tơring glông Čư̆ Păh); ngui tuah rơkĭ ƀơi ia krông Pô Cô (Ia Grai).

Ƀrô hrơi anai, tơring čar Gia Lai ăt pơphun jơnum ngui ƀơi jơlan; rŭ glăi tơlơi ngui ngir đưm, tơlơi ngă yang đưm; pơdă pơƀuh djuai gong brô̆ Dap Kơdư, rup hiam gru grua Gia Lai, pơƀuh gru grua dêh čar yôm phara hăng gơnam yôm dêh čar mơ̆ng tơring čar Gia Lai...Ơi Nguyễn Xuân Hà - Khua anom bruă gru grua - pôr pơhing plơi prong Pleikku, anih hơmâo pơphun lu tơlơi jơnum ngui hloh amăng rơwang hrơi tơjuh ngui ngor brơi thâo.

“Ră anai hơdôm boh să phường, anom bruă mơ̆ng plơi prong Pleiku glăk prăp rơmet bruă pôr pơhing, pơhưč, pơƀuh rup Gia Lai lăi hrŏm, ană mơnuih Pleiku lăi hơjăn kiăng ƀing tuai amăng dêh čar wơ̆t hăng čar rơngiao thâo. Ră anai, hơdôm grup atông čing ƀơi hơdôm boh plơi djuai ania ƀiă glăk gir pơtŏp atông čing, trah rup, mơñam mrai, mơñam rơ-i čơngua či prăk kơ bruă ngui ngor amăng Rơwang hrơi tơjuh gru grua tuai čuă ngui Gia Lai”.

Rơwang hrơi tơjuh gru grua - tuai čuă ngui thun 2023 kiăng pơƀuh gru grua hiam pơhưč, hơmâo anŏ yôm hmư̆ hing kơ gơnam bơwih brơi tuai hyu ngui mơ̆ng tơring čar Gia Lai, biă ñu gru grua atông čing ring hơgor Dap Kơdư amăng Jơlan hơdră rŭ glăi, răk rem, djă pioh pơtrut tui gru grua yôm mơ̆ng tơlơi ngui ngor ngă yang rơbang pơ ala brơi ană mơnuih. Khua jơnum min mơnuih ƀôn sang tơring čar Gia Lai Trương Hải Long kiăng hơdôm anom apăn bruă gơgrong ngă bruă klă hloh, ngă hrŏm pơphun tơlơi jơnum ngui hơmâo gru phrâo, pơhưč ană plơi, tuai čuă ngui, pô tuh pơ alun, djru pơtrut bơwih ƀong huă, gru grua, tuai čuă ngui amăng tơring čar. Hơdôm sang sĭ gơnam ƀong huă, sang jưh tuai ƀu dưi pơđĭ nua pơmă ôh amăng tal anai; mơnuih ƀôn sang ƀơi Pleiku pok pơhai hơbô̆ bruă sang juă glai “Mơ-ak tui hăng pơ sang mơn”...kiăng pioh rup jê̆ giăm, thâo ƀu-eng kơ tuai, pơhlôm hrơi jơnum truh kih, rơnuk rơnua, lăp hơdor.