VOV4.Jarai - Rơgao kơ 36 tal pơplông dik dăk ƀơi plơi prong Đà Lạt, tơring čar Lâm Đồng, tal pơplông hrom Pri Futsal HDBank thun 2022 hmâo pơđut laih amăng čơtlăm lơ 4/7. Tal pơplông tŭč rơnuč mơng rơwang pơplông Pri Futsal HDBank thun 2022 pơphun kơplah wah 2 grŭp Thái Sơn Bắc hăng Sài Gòn FC pơđut, dưi gah grŭp Sài Gòn FC hăng mrô lĕ 3-0.

Anô̆ pơhlôm klă tal pơplông dưi pơđĭ tui hloh bơhmu hăng hơdôm tal pơplông hlâo adih

Tui anun, pơđut tal pơplông, Sahaco lĕ grŭp ba jơlan hlâo amăng glông dăp hăng 20 puang, kiăo tui anun lĕ Thái Sơn Nam, Thái Sơn Bắc hmâo hrom mrô puang 15,  Sài Gòn FC 14 puang. Rơnuč hnal čih dăp lĕ 2 grŭp Cao Bằng hăng Tân Hiệp Hưng, hăng mrô puang 5. Tui hăng grŭp pơphun bruă pơplông Pri Futsal HDBank thun 2022, rơgao kơ hơdôm tal pơplông pơphun ƀơi Đà Lạt brơi ƀuh, anô̆ klă pơplông mơng hơdôm grŭp dưi pơđĭ tui lu hloh bơhmu hăng hlâo adih. Tơlơi anun, sit yơh amra ba glăi lu bôh than prong amăng hơdôm rơwang pơplông mơng tal pơplông mă pri ƀơi ƀôn prong Cần Thơ amăng blan 10 pơ̆ anăp anai./.

Siu H’ Prăk: Pơblang