Hơdôm boh rêu lăng hiam rô̆ anun ƀu kơnong anŏ tŭ yua kơ djop bruă đôč ôh, jing sa mơta gru grua hiam phara biă mă kơ djuai ania Êđê mơ̆ng đưm đă truh ră anai.

Rêu lĕ sa amăng hơdôm mơta gru grua hiam phara biă mă mơ̆ng djuai ania Êđê dŏ djă pioh na nao truh ră anai amăng tơlơi hơdip mơda djop plơi pla ala ƀôn. Rup rap ƀing đah kơmơi djuai ania Êđê gui rêu lăng hiam biă mă. Anun lĕ kơnuih hiam, pơdah rai pran jua kơtang gui gơnam tam mơ̆ng ƀing đah kơmơi hrơi kual Dap kơdư lăng kjăp pran hơtai, tơkai tơngan nao pơ hmua ia djuh gui ba rêu jing gơnam yua ƀu thâo pơčlah ôh hăng drơi jăn pô sit hyu amăng glai klô pĕ añăm, gui ia, hyu pĕ boh troh amăng glai rưng....

Tha plơi ơi Y Sao Hwing thun anai 83 thun dŏ pơ Ƀuôn Pơr, să Ea Tul, tơring glông Čư̆ Mgar, tơring čar Dak Lak lăi, rêu lĕ amăng plơi pla djuai ania Êđê hơmâo mơ̆ng đưm đă laih. Rêu anai mơ̆n, ƀing đah kơmơi dra nao ngă tơhan gui gơnam tam, boh phao kơtuang rơnuk blah ngă djru tơhan hơkrŭ ta, truh ră anai rêu ăt ƀu dưi kơƀah ôh hăng djuai ania Êđê.

“Ƀu thâo lơi mơ̆ng hơbin ñu hơmâo rêu ro anun, dơ̆ng mơ̆ng ƀing gơmơi dŏ čơđai muai, rơnuk ơi yă gơmơi hơmâo laih rêu gui. Rơnuk ơi yă thâo mơñam rêu, gơñu pơtô glăi kơ ană tơčô hrăm tui. Nao koh pơ-ô, koh huai, krih djrao, mơñam, krih huai  ngă hrĕ phuă....hlâo kơ mơñam koh ba glăi krih ƀhu krô, dưm amăng pra apui giong anun kah mă mơñam rêu. Yôm biă ñu pơkra rai pang rêu, pang ñu hiam mơ̆n hă bơkơnar mơ̆n hă, kjăp mơ̆n thơ, ñu anun yơh pơsit kơ rêu ta klă hiam, dưi gui kjăp sui thun, pang arăng pơkra mơ̆ng kyâo, trah kyâo al, kyâo ñao amăng glai. Laih pơkra giong pang rêu truh kơ mông mơñam rêu, tui hluai rup ngă hyuač mơ̆ng anet prong tui bah ƀudah wil. Truh rơnuč lĕ amuañ hrĕ rêu hăng huai kiăng kjăp ƀudah kơđuh kyâo amăng glai ngă hrĕ rêu”.

Rêu lĕ sa gơnam pơkra ming anŏ hiam, pơhrôp hiam, lu mơnuih kơhnăk thâo mơñam rêu ro, bung bai arăng mơñam rêu ngă rêu brung keč pang, rêu blang klang črah tui hluai tơlơi thâo pơčeh mơ̆ng pô mơñam. Rup rêu hiam, mơñam klă arăng adoh pơtưh bơni na nao amăng tơlơi adoh đưm djuai ania Êđê. Kiăng hơmâo rêu hiam, rêu klă mơnuih kơhnăk bruă mơñam rêu khom gir run sơ̆n pran jua mă bruă pơkra ming. Tha plơi Y Djuăn Ktla thun anai 80 thun dŏ pơ Ƀuôn Triă, să Ea Tul, tơring glông Čư̆ Mgar, tơring čar Dak Lak lăi: rup rap ƀing đah kơmơi kah hăng yă, amĭ, neh wa, adơi amai gui rêu amăng glăi mơ̆ng hmua či tlam ƀudah nao gui ia đĭ pơ sang dlông gru đưm djă kjăp amăng tơlơi pơmin pran jua djop pô hlơi tom dŏ amăng plơi pla gru grua đưm djuai ania pô.

“Kiăng pơkra giong sa boh rêu tơnap biă mă, kơnong ƀing hor kơ bruă đôč, hơdeč hmar, hor hrăm tui arăng kah thâo mơñam rêu hiam. Kah hăng ƀing gơmơi đưm hlâo, gưt hiăp ơi yă amĭ ama, hrăm tui mơnuih thâo amăng plơi arăng mơñam rêu ro. Ră anai, mơnuih ƀôn sang ăt mă yua gui rêu nao pơ hmua. Amăng tơlơi pơtưh arăng juăt pia Rơkơi djă tơgă, bơnai gui rêu, nao hmua hrom. Tơlơi anai, kiăng lăi mơ̆ng đưm đă laih rêu jing gơnam yua ƀu dưi kơƀah ôh amăng tơlơi hơdip mơda rĭm hrơi”.

Ră anai, rêu lĕ amăng hơdôm gơnam djă pioh, sĭ kơ ƀing tuai blơi amăng anih tuai čuă ngui. Khă tui anun, ƀing hlăk ai djuai ania Êđê ƀiă đôč mơnuih thâo mơñam laih anun hor kơ bruă mơñam rêu đưm, ƀing tha rơma dŏ bơngơ̆t mơ̆n ră anai bruă mơñam rêu ro gru grua đưm ƀu dŏ dong tah, čơđai rơnuk tơdơi gơñu ƀu thâo krăn ôh rêu ro djuai ania pô.

Tha plơi ơi Y Sao Hwing juăt ơi Ơ Ƀlin lăi dơ̆ng:

“Rĭm sang anŏ djop rơnuk lêng kơ hơmâo rêu ro soh amăng sang, rêu anet prong pioh kơ djop hnơr ană bă đah kơmơi amăng sang anŏ yua, mơ̆ng ƀing yă, neh wa, amĭ, ƀing amai truh kơ adơi đeh, ană amôn čơđai arăng mơñam brơi tui hluai hơbô̆. Ră anai, lu mơnuih ƀu thâo mơñam rêu ôh, kâo bơngơ̆t biă mă tơl ƀing gơmơi tha rơma pơgi kơdih anai, glăi hăng ơi yă ƀu hơmâo mơnuih thâo dơ̆ng tah mơñam rêu Êđê, tơdah ƀing hlăk ai čơđai rơnuk anai hor hrăm tui mơñam thâo mơ̆n”.

Tơlơi hơdip mơda rơnuk anai hăng lu gơnam yua phrâo soh, hơbô̆ pơkra ming ăt phara mơ̆n, hơdôm mơta rêu dŏ djă pioh amăng plơi pla ră anai kah hăng gơnam djă pioh lăng hiam, hơdor glăi kơ gru grua đưm, gui rêu deng dong ƀơi rŏng ƀing đah kơmơi Êđê lăng ăt sa rup rap hiam lăp djă pioh amăng pran jua lu mơnuih.