- Blung hlâo, pơpŭ kơ mơnuih rơgơi kơhnâo Rơ Châm Tih, hrŏm hăng grup ƀing rơgơi kơhnâo mơng djuai ania Jarai pơphun truh kih tal ngui adôh suang atông gông brô̆ jar kmar tal 22 ƀơi Hàn Quốc. Ih pơmĭn hiưm pă kơ tal nao jơnum adôh suang anai ?

Rơ Châm Tih: “Amăng mông adôh suang, atông gông brô̆ anai, arăng rơkâo ƀing gơmơi prap lui sa mông atông gông brô̆, adôh suang mơng djuai ania Jarai. Sit biă ñu, hlâo kơ hrơi nao ngui hrŏm, arăng jao brơi kơ kâo, pơmĭn pơčeh rai bruă atông gông brô̆, črâo brơi ƀing ding kơna amăng grup, yua tui tơlơi rơkâo amăng mông ngui atông gông brô̆, ƀing gơmơi amra ngă hiưm pă brơi mơ-ak hloh, mơng phun atông hơget, atông hiưm pă brơi lăp djơ̆ hăng tơlơi ayun suang dong. Yua anun, kâo ăt pơmĭn na nao, pơčeh phrâo kiăng ngă hiưm pă mông atông gông brô̆ ñu mơ-ak, hơmâo tơlơi mut hrŏm mơng čing hơgor, ting ning, t’rưng, k’ni, klek klok…Kâo khŏm pơmĭn na nao kiăng pok blung, pơđut hĭ hiưm pă, yua anun kâo hơmâo pơčeh rai kiăng ñu mơ-ak hloh, amăng tal nao ngui atông gông brô̆ anai, hơmâo lu tơlơi pơpŭ, yua ƀing gơmơi ba nao tơlơi ngui adôh suang mơ-ak hloh, tơlơi anai ngă kâo hok mơ-ak biă mă”.

- Hơmâo arăng pơpŭ mơ-ak hloh, bơ anŏ yôm phara mơng gông brô̆ djuai ania Jarai amăng hrơi ngui atông gông brô̆ jar kmar tal 22 ƀơi Hàn Quốc hơget ñu ?

Rơ Châm Tih: “Amăng tal nao ngui atông gông brô̆ ƀơi Hàn Quốc, lơm anun hơmâo lu khul grup rai mơng hơdôm boh dêh čar. Ƀing gơñu hơmâo hơdôm tơlơi ngui atông gông brô̆ ăt phara tui djuai ania gơñu mơn. Rĭm boh dêh čar hơmâo gông brô̆ phara, atông ăt phara mơn. Hăng ƀing gơmơi djă ba hơdôm gông brô̆ mơng Pleiku anai jing tơlơi pơ-ư ang biă mă mơn, hơdôm boh čing hơgor, gông brô̆ mơ̆ ƀing gơmơi djă ba đah pơkra rai mơng kram, ale đôč. Tơlơi anai ngă pran jua ƀing gơmơi mơ-ak biă mă.

- Rơbêh 40 thun pơlir hăng bruă hyu atông gông brô̆ tui gru grua djuai ania Jarai, hăng hơmâo lu tơlơi truh kih. Tơlơi hơget ngă mơ-ak amăng pran jua ih hloh ?

Rơ Châm Tih: “Kâo hơdor glăi amăng thun 1997, lơm anun arăng pơphun pơplông ngui adông suang, atông čing hring hơgor, ƀing gơmơi ăt nao ngui hrŏm amăng tal pơplông atông čing hơgor, t’rưng, ting ning…Kâo mơ-ak biă mă. Lơm anun, kâo dưi mă miđai ia mah. Tơlơi anai jai pơsur pran jua kâo khăp, amoaih gru grua djuai ania pô, hăng pơtrut kâo gir run djă pioh. Kiăng dưi mă miđai amăng tal pơplông anun, ăt yua mơng pran gir run pơtop hrăm, tuč rơnuč ăt ba glăi boh tŭ yua mơn”.

- Tơlơi anai brơi ƀuh, tơlơi adôh suang, gông brô̆ mơng djuai ania Jarai yôm biă mă amăng tơlơi hơdip mơda, jing gru grua hiam, pơ-ư ang biă mă. Tui ih pơmĭn, ƀing ta khŏm ngă hiưm pă kiăng djă pioh hăng tŏ tui gru grua yôm phara anun ?

 Rơ Châm Tih: “Kâo čang rơmang abih bang mơnuih gum tơngan hrŏm djă pioh gru grua djuai ania ta, hăng čang rơmang Ping gah, kơnuk kơna đing nao, gum djru brơi, blung hlâo lĕ ƀing rơgơi kơhnâo. Kar hăng ƀing gơmơi anai, lĕ ƀing mơnuih thâo rơđah gru grua djuai ania pô, tơdah dưi ăt kiăng djru brơi prăk kak kiăng ƀing gơmơi dưi pok anih pơtô hrăm brơi ană tơčô. Ră anai ƀing rơgơi kơhnâo jai hrơi aset tui yơh, ha bơnah lĕ yua thun tha ƀudah glăi pơ ơi yă laih. Kâo čang rơmang abih bang mơnuih amăng plơi pla gum hrŏm djă pioh, ƀing ta anăm wơr ôh. Laih anun dong, kâo ăt čang rơmang gong gai ƀon lan pok glăi hăng pơphun na nao hơdôm anih pơtô atông gông brô̆. Kâo ăt dŏ pơmĭn amra hơmâo lu dong mơnuih hor. Tơlơi anai yôm phăn biă mă, kiăng hơmâo mơnuih hor kah mơng dưi djă pioh hăng tŏ tui gru grua djuai ania pô.

- Bơni kơ ih mơnuih rơgơi kơhnâo Rơ Châm Tih hơmâo pioh mông bơră ruai hăng VOV. Pơpŭ kơ ih sa bơyan bơnga mơ-ak mơ-ak, hiam drơi jăn, tŏ tui ngă lar hyu pran khăp gru grua djuai ania pô tơl abih bang mơnuih./.