66 mơta rup hăng tơlơi čih ră ruai hơmâo ba pơdă thâo brơi lu mơnuih ĕp lăng hăng lu mơta ia iom phara, rim pok rup jing sa tơlơi ră ruai kơ mơnuih ngă tơhan blah ngă mơ̆ng khul ling tơhan mơnuih ƀôn sang, kông an mơnuih ƀôn sang amăng rơnuk pơđĭ kyar dêh čar. Rup hăng tơlơi čih anăn “Trường Sơn Đông” kač pơthâo rup rap yak tơkai rơbat nao pơ anăp mơ̆ng sa čô tơhan ƀơi jơlan ruăi čư̆ siăng Trường Sơn hmư̆ hing đưm adih, rup rap sa čô tơhan khin hơtai, kjăp pran jua kơtang mah găn ƀơi anăp lu tơlơi hŭi rơhyưt boh ƀôm pơtuh, tơlơi djai brŭ ngă rai; rup anăn “Tơlơi Wa pơtă pơtăn”, lăi pơthâo tơlơi hơdor pioh kơ Khua mir sir Hồ Chí Minh nao čuă hăng pơtă pơtăn kơ khua mua ling tơhan pơnah kơnông hăng mơgăt rơdêh por ƀơi anăp tal blah ngă ayăt kơsung blah lŏn ia ta; Rup anăn “Ƀing gơ̆p ngă tơhan” lăi nao kơ ƀing tơhan blah ngă hăng tơlih pơlih wai lăng ia rơsĭ rơnuk lŏn ia rơngai laih: Hơmâo găn rơgao giăm 40 thun mă bruă amăng ling tơhan, amăng anun 30 thun ngă tơhan pơnah kơnông hăng anom bruă rơdêh por tơhan, akŏ bruă lăi nao tơlơi pơmin hiam klă mơ̆ng pô rơgơi kač rup Đào Hoa Vinh. Ñu pơblang glăi boh yôm tŭ yua mơ̆ng rup anăn “Tơlơi Wa pơtă pơtăn”:

“Kâo ƀuh lăp pran jua biă mă hăng rup lăi nao kơ Wa Hồ hăng ling tơhan mơgăt rơdêh por yua kơ hlăk wa dŏ hơdip, ưa pơdah rai tơlơi khăp ƀu eng ƀơ̆i hăng khul tơhan mơgăt rơdêh por, hơmâo 11 wơ̆t nao čuă hăng pơtrut pran jua, nao tơl anih mă bruă, tơdron blah tơña bla ƀing khua mua, ling tơhan amăng hơdôm thun blah ngă hăng ayăt Mi. Rơngiao kơ tơña bla, pơtrut pơsur pran jua, tơlơi hơdip mơda, sang anŏ, bruă mă mơ̆ng ƀing khua mua, ling tơhan wa dŏ pơtă pơtăn, lăng anai kah hăng anăp pơčrâo ba bruă mă kơ ƀing tơhan mơgăt rơdêh por, ƀu kơnong amăng rơnuk blah wang đôč ôh, ră anai rơnuk pơklaih rơngai lŏn ia hai, man pơdong lŏn ia pơgang dêh čar hai hơdôm tơlơi wa pơtă lui hlâo lăng kah hăng anăp pơčrâo brơi pran jua tơlơi pơmin pioh mă bruă, gir run kơtưn abih pran jua amăng bruă pơhrăm drơi jăn pô djru akŏ pơdong lŏn ia hăng pơgang tơlơi rơnuk rơnua dêh čar rơnuk anai”.

Tal pơdă rup anai hơmâo 66 pok rup hăng tơlơi čih ră ruai mơ̆ng ding kơna Khul pơčeh kơ bruă wai pơgang lŏn ia laih anun mơ̆ng ƀing mơnuih kač rup ƀơi Hà Nội, Nghệ An, Thanh Hóa, Thái Bình, Phú Thọ, Hải Phòng....Abih bang rup ba pơdă anai lêng kơ pơčeh phrâo kač rup amăng thun 2023 đôč. Lăp đing nao, hrŏm hăng lu rup mơ̆ng ƀing kač rup jing ƀing tơhan mơnuih ƀôn sang hăng kông an mơnuih ƀôn sang, dŏ hơmâo lu mơnuih kač rup mơ̆ng ƀing hlăk ai phrâo gah rơngiao kơ anom bruă tơhan gơñu hơmâo tơlơi pơƀuh lăng nao phara mơ̆n anŏ hiam djơ̆ lăp. Lăng yôm boh tŭ yua hăng boh yôm phun mơ̆ng rup hăng tơlơi čih ba pơdă tal anai hăng anăn “Yak tơkai hrŏm ling tơhan” 2023, ơi Nguyễn Bằng Lâm, Kơ-iăng khua hơđăp Khul kač rup hiam Việt Nam lăi lĕ:

“Pơdă rup anai kâo ƀuh yôm biă mă, lu rup hiam, tŭ yua mơ̆ng lu mơnuih kač rup mơ-it rai, ba pơdah, mrô rup lu hiam hăng yôm hloh lăi nao bruă wai pơgang lŏn ia, rup rap mơnuih ngă tơhan đưm hăng ră anai. Gơmơi ƀuh mơak biă mă lăi nao kơ tơhan blah ngă hơkrŭ lŏn ia djơ̆ lăp, bruă hơkrŭ pơgang lŏn ia ăt dưi hơmâo lu mơnuih đing nao, wơ̆t hăng ƀing kač rup hlăk ai rơnuk anai, ƀing tha rơma tom ngă tơhan blah ngă rơnuk blah wang đưm pơčeh. Anun lĕ tơhnal ƀuh tơlơi mơak pioh prăp lui yak nao thun 2024 amra pơdă rup tar ƀar amăng dêh čar lăi nao kơ rup rap phung tơhan blah ngă hơkrŭ lŏn ia, sa tơlơi jơnum prong mơ̆ng khul čih pơčeh kač rup hiam dêh čar lăi nao kơ tơhan blah ngă, hrŏm hăng bruă ruah apah pri pơpŭ bơni 5 thun sa wơ̆t mơ̆ng Ding jum ling tơhan thun 2025”.

Jă đôm hăng boh yôm phun hăng rup pơdă pơƀuh lu mơta ră ruai kơ ling tơhan mơnuih ƀôn sang, kông an mơnuih ƀôn sang amăng rơnuk blah wang đưm hăng ră anai, amai Nguyễn Mai Anh, mă bruă ƀơi ƀôn prong Hồ Chí Minh lăi pơthâo pran jua ñu pơmin tui anai:

“Ƀing mơnuih rơgơi kač rup hơmâo pơthâo tơlơi kiăng lăi mơ̆ng gơñu hăng ia iom, kulơr amăng rup, gru kač ling rup pơƀuh rơ-un hiam ƀudah hơmâo rup rơđah rơđong, lơlong rơgoh ta thâo krăn tong ten rup kiăng lăi hăng boh kiăng pia mơ̆ng rup anun, pơtruh brơi kơ mơnuih lăng thâo kơ tơlơi khăp ƀu-eng mơ̆ng gơñu hăng ƀing ling tơhan laih anun tơhan blah ngă tơbiă rai mơ̆ng mơnuih ƀôn sang pơgang lŏn ia”.

Tơdah mrô rup ba pơdă amăng lu wơ̆t pơdă hlâo adih ƀu lu đơi ôh, tal pơdă anai anăn “Yak tơkai hrŏm ling tơhan” thun anai, lu mơta rup rap tơlơi čih pơblang ƀu kơnong hiam rô̆ đôč ôh, hơmâo lu rup laih anun anŏ tŭ yua hiam hloh. Anai lĕ yak ngă bruă kah hăng atur pioh kơ ƀing mơnuih rơgơi kơhnâo kač rup pơtum kơ bruă pơčeh phrâo kač rup ră ruai glăi kơ bruă ling tơhan, mơnuih ngă tơhan blah ngă amăng rơnuk blah wang hơkrŭ lŏn ia, anăp nao hơdor glăi tal 80 thun Hrơi akŏ pơdong khul ling tơhan mơnuih ƀôn sang Việt Nam amăng thun pơ anăp.