VOV4.Jarai - Hăng tơlơi pơsit “Yua kơ sa kual Đông Nam Á kơtang ƀiă dong” mông pơphun SEA Games tal 31 amra pơphun amăng 8 mông mơmŏt lơ 12/5 ƀơi tơdron đă boh lông Mỹ Đình hăng anăn “Pơdah pran kơtang - Let’s shine (ăt lĕ anăn amăng tơlơi adôh sit nik amăng SEA Games tal 31) lĕ tơlơi gir run pơdah pran kơtang hăng yôm phara mơng gru grua hơdôm dêh čar kua Đông Nam Á; iâu pơthưr gum pơgôp, pơlăi nao rai kiăng pơjing sa kual hơđong kjăp amăng thun blan rŏng lŏn tơnah glăk rung răng kơsung blah hăng lu tơlơi lông.

Jơlan hơdră pơphun hăng mông pơƀuh ƀô̆ mơta mơnuih nao pơplông, dui đĭ hla kơ Việt Nam hăng adôh Quốc ca, dui đĭ hla kơ Đông Nam Á hăng SEA Games 31. Tơdơi kơ mông pơphun, 11 čô mơnuih pơplông bơrơguăt drơi jăn amra djă apui laih anun ba nao tŭi ƀơi gong apui SEA Games 31.

Mông pơphun pơdah rup rap hiam hloh mơng sa boh dêh čar Việt Nam jê̆ giăm, khăp kơtuai, hrŏm hăng hơdôm dêh čar kual ASEAN pơkŏn pơdah pran kơtang ƀiă dong tơdơi kơ abih klin Covid-19 hluai tui 3 črăn amăng mông pơphun. Črăn sa: “Việt Nam jê̆ giăm”. Črăn 2: “Đông Nam Á kơtang”. Črăn 3: “Đông Nam Á bang bơngač”.

Siu Đoan: Pơblang