Hơdôm hrơi akŏ thun phrâo anai, anih tuai hyu ngui ĕp gru grua hiam đưm plơi pla či Kŏ Tam, plơi prong Ƀuôn Ma Thuôt, tơring čar Dak Lak ƀuh hyơ hyơr kơ bơnga čuh blang, lăng hiam djop ia iom, tuai rơnguai mơ̆ng ataih hăng jĕ giăm mut tơbiă ik ăk kơdok kơdor mơtam. Amai H'’rim Ayun, mơnuih mă bruă apah ƀơi anih tuai hyu ngui anai lăi:

“Ƀơi sang dlông anai hơmâo jơlan hơdră adoh suang, mơñum tơpai čeh pơphun mơ̆ng hrơi tal 1 truh hrơi tal 5 thun phrâo. Ƀơi djop anih tuai hyu ngui, ĕp lăng dŏ glăi lêng kơ hơmâo bruă mă gru grua pioh tuai ngă hrŏm. Ƀrô bơyan anai, mông gêh găl kơ ta pôr pơthâo gru grua hiam đưm djuai ania Êđê kơ djop mơnuih thâo hăng jơlan hơdră anai ƀing tuai ƀuh hor biă mă, sit mơ̆n ƀu djơ̆ lăi mông hơƀơi, hrơi pơpă ôh dưi pơphun lăi pơthâo gru grua hiam mơ̆ng djuai ania Êđê ƀơi plơi pla anun yơh mông anai mơak biă mă čơkă ƀing tuai rai ngui ĕp lăng bơyan ngă yang thun phrâo ƀong têt anai”.

Jing sa amăng hơdôm čô tuai ruah Dak Lak či nao ngui, pơdơi pơdă bơyan phang akŏ thun phrâo, ayong Nguyễn Thiên Đăng, mơ̆ng tơring čar Đồng Nai hok mơak lăi: Hơdôm hrơi laih rơgao, ƀu kơnong dŏ hrŏm mơak hyu ĕp glai klô čư̆ čan kyâo pơtâo mơtah mơda rơ-ơ̆ đôč ôh, ñu dŏ hơmâo anŏ gêh găl găn rơgao sit nik ĕp gru grua hiam đưm plơi pla hiam biă mă. Biă mă ñu tal blung ngui hrŏm khul atông čing, suang arap, kiăng djă tơngan ayun suang tui gru grua hiam đưm laih anun mơñum tơpai čeh, giong anun ayun suang jum dar apui arôk krah lan sang ngui ngor.

“Mơ̆ng hơne kâo hơmâo hyu dar djop anih amăng anai laih, lăng atông čing, suang arap laih anun mơñum tơpai čeh, ƀong mơnong ƀong huă gru grua đưm arăng ăm arăng hơkŏp, brông amăng  đing, añăm mơnong ngă djơh hăng anun ƀong jơman biă mă laih anun suang yơh mơak hloh”.

Hăng amai Huỳnh Thị Thủy, mah dŏ hăng mă bruă ƀơi Dak Lak lu thun hăng anai, samơ̆ thun anai sang anŏ ñu ăt ruah anih nao ngui Ƀuôn Akŏ Dhông- sa boh plơi hơnơ̆ng hnăi amăng plơi prong mơtam pioh hyu ngui akŏ bơyan phang thun phrâo. Tui hăng ñu, anai lĕ bruă ngă kiăng ƀing čơđai muai ană bă ñu ƀuh hăng thâo hluh kiăng pơpŭ kơ gru grua hiam đưm djuai ania. Bruă ngă găn rơgao hyu ngui mơak lăng arăng atông čing, suang arap, mut hrŏm djă tơngan suang hrŏm ayun suang laih anun ĕp blơi mơnong ƀong pơkra ming tui gru grua đưm phara, anŏ jơman ñu, kiăng kơ ƀing ană bă thâo hluh gru grua hiam đưm amăng plơi pla.

“Têt thun anai, kâo ba sang anŏ nao ngui pơ anih tuai ngui anai, kiăng ĕp lăng găn rơgao tơlơi mơak pơ anai. Yua pơ anai, hơmâo lu bruă ngui ngor mơak tui gru grua đưm laih anun hơdai gum hrŏm bruă ngă phrâo rơnuk anai. Hơmâo jing čêng, ngui hrŏm mơñum tơpai čeh mơak. Kâo čang rơmang abih bang sang anŏ rai ngui hrŏm pơ anai, kiăng ĕp anŏ hiam gru grua, tơlơi phiăn đưm plơi pla djơh hăng anun. Ta dŏ pơ anai, kiăng thâo hluh hăng ană bă ta ăt găn rơgao thâo hluh mơ̆n hnun kah ngă yang thun thun phrâo, ƀong têt ñu djơ̆găl hloh”.

Bơyan phang bơnga čuh ƀơi Dak Lak ƀu kơnong ba glăi mông mơak bơyan adai rơ-ơ̆, angin ƀhơ ƀhưt đôč ôh, dŏ jing mông gêh găl pơtruh nao rai rơnoh yom gru grua đưm phara mơ̆ng djuai ania. Mơnuih ƀôn sang hăng tuai rơnguai hok mơak dŏ ngui hrŏm amăng sa bơyan pơdơi pơdă čơkă thun phrâo mơak trơi pơđao, gru grua hiam pơ anai hăng lŏn mơnai glai klô mut tơma hrŏm ayuh hyiăng rơgoh hơdjă pioh glăi sa tơlơi hơdor glăi ƀu thâo wor rơbit hĭ ôh.